काठमाडौं । युक्रेनका राष्ट्रपति भोलोदिमिर जेलेन्स्कीले भ्लादिमिर पुटिनले युक्रेनविरुद्ध लामो समयदेखि ड्रोन युद्ध गर्ने योजना बनाएको बताएका छन् । जेलेन्स्कीले जनवरी २ मा आफ्नो सम्बोधनमा रुसले इरानमा निर्मित शाहिद-१३६ ड्रोन प्रयोग गरेर लामो दूरीको आक्रमणको योजना बनाएको बताए। उनले भने कि मस्कोको रणनीति युक्रेनको जनसंख्या, देशको वायु रक्षा र ऊर्जा प्रणालीलाई नष्ट गर्ने हो।

उनले भने– नयाँ वर्ष आएको दुई दिन मात्र बितेको छ र अहिलेसम्म ८० भन्दा बढी इरानी ड्रोन युक्रेनमाथि खसालिएको छ ।’ उनले यो ड्रोनको संख्या छिट्टै बढ्न सक्ने बताए । उनले भने ‘आगामी हप्ताहरूमा यी आक्रमणहरू अझ बढ्न सक्छ। रुसले हामीलाई हराउनको लागि सबै शर्त लगाउन सक्छ, तर हामीले यी आतंकवादीहरूको हरेक योजनालाई विफल पार्न सक्दो प्रयास गर्नुपर्छ।’

रुसी सेनाले २ जनवरीको राती पनि इरानको शाहिद-१३१-१३६ कामिकाजे ड्रोन प्रयोग गरेर युक्रेनमा ठूलो मात्रामा आक्रमण गरेको थियो। युक्रेनको एयर डिफेन्सले सबै ३९ ड्रोन नष्ट गरेको जनाएको छ।

कीभका मेयर भिटाली क्लित्सकोले आक्रमणमा सहरको ऊर्जा पूर्वाधार सुविधाहरूमा क्षति पुगेको बताए। रुसी सेनाले अक्टोबरको शुरुदेखि नै युक्रेनभरि ऊर्जा पूर्वाधारमा बारम्बार आक्रमण गरेको छ, जसका कारण विद्युत, पानी र तातोपना कटौती भएको छ। यति मात्र होइन, यस्ता घटनामा दर्जनौंको ज्यान गएको छ ।

यद्यपि मस्कोले पनि युक्रेनको ऊर्जा प्रणाली आफ्नो निशानामा रहेको स्वीकार गरेको छ । जेनेभा महासन्धि अनुसार आवश्यक सार्वजनिक पूर्वाधारमा आक्रमण गर्नु युद्ध अपराध हो। रुसको रक्षा मन्त्रालयले सोमबार पूर्वी डोनेट्स्क क्षेत्रमा युक्रेनको रकेट आक्रमणमा आफ्ना ६३ सैनिक मारिएको जनाएको छ ।

रुसको नियन्त्रणमा रहेको डोनेट्स्क क्षेत्रमा रुसी सैनिक तैनाथ रहेको क्षेत्रमा रकेट आक्रमण भएको हो । मन्त्रालयले युक्रेनी पक्षबाट हिमर्स प्रक्षेपण प्रणालीले छवटा रकेट प्रहार गरेको, जसमध्ये दुईवटा रकेट रुसी सेनाले नष्ट गरेको बताएको छ । उनीहरूले विश्वास गरे कि यो युक्रेन युद्धको सबैभन्दा घातक आक्रमण मध्ये एक हो जसमा धेरै सैनिक मारिएका छन्।

आइतबार र सोमबारको बीचमा लुहान्स्कमा ५० भन्दा बढी युक्रेनी सैनिक मारिएको रुसी सेनाले जनाएको छ । लुहान्स्कमा रुसी नियुक्त प्रशासक इगोर स्ट्रेलकोभले युक्रेनी आक्रमणमा सयौं सैनिक मारिएको बताएका छन्। यसै क्रममा रुसी सेनाले पछिल्लो एक दिनमा युक्रेनी सेनाले लुहान्स्क र डोनेस्कमा ४०० वटा हमला गरेको जसका कारण करिब १६ हजार घर बिजुलीविहीन रहेको बताएको छ ।

बीबीसी रसियाका अनुसार पछिल्लो तीन महिनामा युक्रेन आक्रमणमा कम्तीमा ५३८ रुसी सैनिक मारिएका छन् । युक्रेनको राष्ट्रपति कार्यालयले रुसले पूर्वी डोनेट्स्कको ड्रुज्किभका शहरमा धेरै मिसाइलहरू प्रहार गरेको बताएको छ। तर, अहिले यो हमलामा दुई जना घाइते भएका छन् ।

रक्षामन्त्री ओलेक्सी रेज्निकोभले युक्रेनमा रुसले गरेको हमलाले देशको वातावरणलाई ३५.३ अर्ब डलरको नोक्सानी पुर्याएको बताए । यसबाहेक युक्रेन–युरोपियन युनियनको अर्को शिखर सम्मेलन फेब्रुअरी ३ मा कीभमा हुने युक्रेनी राष्ट्रपतिको कार्यालयले जनाएको छ ।