काठमाडौं । फिलिपिन्सको माउन्ट कन्लाओनमा सोमबार ज्वालामुखी विस्फोट भएको छ । समाचार एजेन्सी एएफपीका अनुसार ज्वालामुखी नेग्रोस टापुमा रहेको छ।

विस्फोटपछि आकाशमा पाँच किलोमिटर उचाइमा खरानीको बादल मडारिएको थियो । त्यहाँ अझै पनि ज्वालामुखीका फोहोर र तातो खरानी निरन्तर बाहिर निस्किरहेको छ।

सुरक्षा अधिकारीहरूले त्यहाँबाट मानिसहरूलाई बाहिर निकाल्न थालेका छन्। नेग्रोसका गभर्नर जोस लाक्सका अनुसार मानिसहरूलाई ओक्सीडेन्टल प्रान्तमा सारिएको छ, जहाँ अहिलेसम्म ७०० भन्दा बढी मानिसहरू राहत शिविरहरूमा बसिरहेका छन्।

फिलिपिन्स सरकारले मानिसहरूलाई ज्वालामुखी क्षेत्रमा जान प्रतिबन्ध लगाएको छ। सरकारले सो क्षेत्रमा सल्फ्युरिक ग्यास फैलिन सक्ने चेतावनी दिएको छ । सल्फ्युरिक ग्यासले छालाको एलर्जी र श्वासप्रश्वासमा समस्या निम्त्याउँछ।

स्थानीयवासीका अनुसार ज्वालामुखी विष्फोटपछि त्यसको फोहोर सडक र खोलामा बगेको थियो । जसका कारण धेरै क्षेत्रका सडक बाढी र हिलोले भरिएका छन् । ज्वालामुखीमा स–साना विस्फोटहरू निरन्तर भइरहेका छन् । जसका कारण आकाश धुवाँले भरिएको छ ।

विस्फोटका कारण कन्लाओन सहरका विद्यालय र कलेजहरू बन्द गरिएका छन् । साथै उक्त क्षेत्रबाट हुने उडानहरु पनि रद्द गरिएको छ । यहाँ हालसम्म ३२ उडान रद्द भएका छन् । सुरक्षा अधिकारीहरूले आगामी दिनमा थप विस्फोट हुने आशंका गरेका छन्। उद्धार टोली २४सै घण्टा मानिसको उद्धारमा खटिने उनले बताए ।

यसअघि गत वर्ष फिलिपिन्समा माउन्ट मेयोन ज्वालामुखी विस्फोट भएको थियो । त्यतिबेला यस ज्वालामुखीबाट २ किलोमिटर उचाइसम्म धुवाँको मुस्लो उठिरहेको थियो, जसका कारण मानिसलाई सास फेर्न गाह्रो भइरहेको थियो । सरकारले सावधानीका रुपमा माउन्ट मेयोनको ६ किलोमिटरसम्मको क्षेत्रलाई जोखिमयुक्त क्षेत्र घोषणा गरेको थियो ।