काठमाडौं । मेसेजिङ एप टेलिग्रामका मालिक र संस्थापक पावेल दुरोभलाई फ्रान्स छोड्न प्रतिबन्ध लगाइएको छ।

पेरिसका अभियोजकहरूले म्यासेजिङ एपमा संगठित अपराधको अनुसन्धानको भागको रूपमा पावेल दुरोभलाई फ्रान्समा औपचारिक अनुसन्धान अन्तर्गत राखिएको बताएका छन्।

३९ वर्षीय दुरोभलाई हिरासतमा राखिएको छैन। उनलाई न्यायिक निगरानीमा राखिएको छ । उनले पाँच मिलियन युरो जम्मा गर्नुपर्नेछ।

रुसी मुलका अर्बपति दुरोभ पनि फ्रान्सेली नागरिक हुन् । उनी हप्तामा दुई पटक फ्रान्सेली प्रहरी चौकीमा हाजिर हुनुपर्नेछ । उनलाई फ्रान्सबाट बाहिर जान अनुमति छैन।

गत शनिबार, पावेल दुरोभलाई पहिलो पटक पेरिसको उत्तरमा रहेको ले बोर्जेट विमानस्थलमा एपसँग सम्बन्धित अपराधको वारेन्ट अन्तर्गत पक्राउ गरिएको थियो।

बुधवार, पेरिस अभियोजकले एक विज्ञप्तिमा भनेअनुसार दुरोभलाई कथित अपराधको लागि औपचारिक अनुसन्धान अन्तर्गत राखिएको थियो।

दुरोभ विरुद्धको आरोपमा संगठित गिरोहको तर्फबाट लेनदेनको लागि अनलाइन प्लेटफर्म चलाउनमा संलग्नता, अधिकारीहरूसँग वार्ता गर्न अस्वीकार र बालबालिकाका अश्लील छविहरूको संगठित वितरणमा संलग्नता समावेश छ।