राजविराज। सप्तरी डाक्नेश्वरी नगरपालिका–१ कविलासा गाउँकी ५५ वर्षीया चन्दरदेवी साहले १९ वर्षीया छोरी सन्तोषीको अपहरण, बलात्कार र हत्या तथा १७ वर्षीय छोरा आशिषलाई बेपत्ता पार्नेमाथि कडा कारबाही माग गरेकी छन् । छोरी सन्तोषीको बलात्कारपछि हत्या तथा छोरा आशिषलाई बेपत्ता बनाएको ३ वर्ष पुरानो घटनाका आरोपीलाई प्रहरीले पक्राउ गरपछि मंगलबार सप्तरी सदरमुकाम राजविराज आएकी उनले सञ्चारकर्मीसँग ‘दोषीमाथि कडा कारबाही हुनुपर्ने’ माग गरेकी हुन् ।

प्रहरीले आरोपीमध्येका सोही वडाका धीरेन्द्रकुमार साहलाई ११ दिनअघि पक्राउ गरेको थियो । साह गत १६ मंसिरमा सम्पन्न उपनिर्वाचनमा जसपा नेपालबाट वडाध्यक्ष पदमा निर्वाचित भएका थिए ।

पदभार ग्रहण कार्यक्रममा सरिक हुन गएका बेला प्रहरीले उनलाई गत २१ मंसिरमा कार्यक्रमस्थलबाटै पक्राउ गरेको थियो । जिल्ला प्रहरी कार्यालय सप्तरीका प्रवक्ता प्रहरी नायब उपरीक्षक जीतेन्द्रकुमार बस्नेतका अनुसार पक्राउ परेका साहमाथि अपहरण तथा शरीर बन्धक, जबर्जस्ती करणी र कसुर ज्यानलगायत मृद्दामा सप्तरी जिल्ला अदालतबाट १०–१० दिन गरी दुईपटक म्याद थपी अनुसन्धान कार्य भइरहेको छ ।

पछिल्लोपटक मंगलबार सप्तरी जिल्ला अदालतबाट दोस्रोपटक १० दिनको म्याद थपेर साहलाई नियन्त्रणमा राखी अनुसन्धान भइरहेको प्रहरी उपरीक्षक ढकेन्द्र खतिवडाले जानकारी दिए ।

प्रहरीका अनुसार १७ साउन २०७९ मा भएको सन्तोषीको अपहरण तथा शरीर बन्धक, जबर्जस्ती करणी र कर्तव्य ज्यानलगायत अपराध गरेको साहसहितका केही व्यक्तिमाथि आरोप छ ।

सो अपराधमा संलग्न आरोपीविरुद्ध पीडित परिवारद्वारा १९ साउन १९ २०७९ मा इलाका प्रहरी कार्यालय कल्याणपुरमा जाहेरी परेको थियो । मुद्दा दर्ता भएपश्चात् १२ चैत २०८० मा उच्च अदाललत जनकपुर–राजविराज इजलासबाट परमादेश जारी भएको प्रहरीको भनाइ छ । १५ साउन २०८१ मा प्रतिवादीविरुद्ध पक्राउ पुर्जी जारी भएपछि साहलाई पक्राउ गरिएको प्रहरीको भनाई छ । घटनाका अन्य आरोपीको खोजी कार्य भइरहेको छ ।

मृतक सन्तोषीकी आमा चन्दर देवीका अनुसार घटनाको केही दिनपछि १७ वर्षीय छोरा आशिष बेपत्ता भएका थिए । उनको अवस्था अझै अज्ञात छ । छोरीको अपहरण, बलात्कार र हत्या घटना प्रकरणमा संलग्न रहेकाले ‘घटना मिलापत्र गर्न विभिन्न आर्थिक प्रलोभन देखाउनुका साथै मुद्दा फिर्ता लिन धम्कीपूर्ण दबाब दिने गरेको’ उनले बताइन् । आफ्नो छोरालाई पनि सोही समूहले बेपत्ता बनाएको उनको दावी छ ।

चन्दर देवीले छोराको अवस्था पत्ता लगाई दिने कार्यमा समेत सबैलाई सहयोग गरिदिन आग्रह गरेकी छन् । ‘मेरो छोरीको ज्यान त अब फर्किंदैन तर छोराको पनि अत्तोपत्तो छैन,’ उनले भनिन्, ‘छोरालाई पनि मारिसके कि ज्यूँदै छ, कम्तीमा छिटोभन्दा छिटो प्रहरीले छोराको अवस्थामा पनि सार्वजनिक गरोस् ।’

राजधानी दैनिकबाट