सप्तरी । जनता समाजवादी पार्टी नेपालका अध्यक्ष उपेन्द्र यादवले कांग्रेस-कम्युनिस्ट पार्टीको ३५ वर्षे शासन कालले देशमा भएको विकासलाई समाप्त पारेको बताएका छन्।

जनता समाजवादी पार्टी नेपाल सप्तरी निर्वाचन क्षेत्र नम्बर १ ले सप्तरीको कञ्चनरुप नगरपालिकामा बुधबार आयोजना गरेको क्षेत्रीय अभिमुखिकरण कार्यक्रमलाई सम्बोधन गर्दै उनले विकासलाई समाप्त पार्नुबाहेक कांग्रेस-कम्युनिस्टले कुनै नयाँ उपलब्धिमूलक काम नगरेको आरोप लगाए।

अध्यक्ष यादवले कांग्रेस- कम्युनिस्ट शासनकालमा सबैभन्दा बढी शिक्षा र स्वास्थ्य ध्वस्त भएको बताए। बेरोजगारी समस्या उत्कर्षमा पुगेको उनको भनाइ छ।‘कांग्रेस-कम्युनिस्टले देशलाई भ्रष्टाचारको दलदलमा फसाउनुका साथै लुट र कमिसन तन्त्रमा मुलुकलाई डुबाएको उनले आरोप लगाए।

‘अहिले मुलुकमा सुशासन छैन। गरिबी, बेरोजगारी समस्या वृद्धि तथा उद्योग बन्द र कृषि उत्पादन ठप्प हुँदा मुलुक पछाडि परेको उनले बताए।

देश विकासका लागि मधेसी, आदिवासी, दलित, महिला, मुश्लिमसहित उत्पीडित, अपेक्षित अपहेलित जाति समुदाय एकताबद्व भएर संघर्षमा जानुको विकल्प नहेको यादवको भनाइ छ।

जसपा नेपाल सप्तरी निर्वाचन क्षेत्र नम्बर १ का अध्यक्ष हेमन्त कुमार बहडेखेरको अध्यक्षतामा आयोजित कार्यक्रममा केन्द्रीय सदस्य शम्भु झा, भरत महतोलगायतकाले धारणा राखेका थिए।