काठमाडौं । गाजाको सिभिल डिफेन्स एजेन्सीका अनुसार बुधबार राति युद्धविराम सम्झौता घोषणा भएयता गाजा पट्टीमा इजरायली आक्रमणमा १०० भन्दा बढी व्यक्तिको मृत्यु भएको छ।

प्रवक्ता महमुद बसालले २७ बालबालिका र ३१ महिलासहित १०१ जनाको मृत्यु भएको र २६४ जनाभन्दा बढी घाइते भएको जानकारी दिए ।

उनले भने, ‘हिजो राति उत्तरी गाजाको अल–जुर्न क्षेत्रमा रहेको एउटा घरमा इजरायली आक्रमणमा नौ जनाको मृत्यु भएको थियो भने हिजो मध्य गाजाको एउटा घरमा इजरायली आक्रमणमा थप पाँच जनाको मृत्यु भएको थियो ।’

प्यालेस्टिनी समाचार एजेन्सी वाफाका अनुसार शुक्रबार बिहान गाजा पट्टीका धेरै क्षेत्रमा बमबारी जारी रहेको थियो ।

बुधवार, अमेरिका र कतारले इजरायल र हमास बीच युद्धविराम सम्झौताको बारेमा पहिलो जानकारी दिए।

अक्टोबर ७, २०२३ मा हमासले इजरायलमा आक्रमण गर्‍यो। जवाफमा, इजरायलले गाजामा सैन्य कारबाही सुरु गर्यो र त्यसयता जारी छ।