काठमाडौं । पाकिस्तानका सुरक्षा स्रोतहरूले बलुचिस्तान प्रान्तमा रेल अपहरणपछि यात्रुहरूलाई उद्धार गर्ने आफ्नो अभियान अझै जारी रहेको बताएका छन्।

यहाँ मंगलबार, सशस्त्र अतिवादीहरूले यात्रुहरूले भरिएको रेलमा आक्रमण गरे र यात्रुहरूलाई बन्धक बनाए।

पाकिस्तानका सुरक्षा स्रोतहरूले बीबीसी उर्दूलाई बताएअनुसार हालसम्म १५५ जनाको उद्धार गरिएको छ र उनीहरूको कारबाहीमा २७ जना अतिवादी मारिएका छन्।

सुरक्षा स्रोतहरूले जाफर एक्सप्रेसमा भएको आक्रमणको पछाडि रहेकाहरू अफगानिस्तानमा यसको योजना बनाउने आफ्ना मानिसहरूसँग सम्पर्कमा रहेको दाबी गरेका छन्।

रेलमा भएको आक्रमणको जिम्मेवारी पृथकतावादी समूह बलोच लिबरेशन आर्मी (बीएलए) ले लिएको छ। यो आक्रमण क्वेटाबाट पेशावर जाँदै गरेको जाफर एक्सप्रेसमा भएको थियो।

रेलवे अधिकारीहरूका अनुसार रेलमा नौ वटा कोच थिए र त्यसमा ४०० भन्दा बढी यात्रु यात्रा गरिरहेका थिए।

पाकिस्तानका गृह राज्यमन्त्री तलाल चौधरीले जाफर एक्सप्रेसका धेरै यात्रुहरूलाई अतिवादीहरूले रेलबाट ओरालेर पहाडी क्षेत्रमा लगेको बताएका छन्।