काठमाडौं । क्यानडाका प्रधानमन्त्री मार्क कार्नीले क्यानडाको अमेरिकासँगको मूल रूपमा अर्थतन्त्रलाई एकीकृत गर्ने र सुरक्षा तथा सैन्य सहयोगलाई गहिरो बनाउने कुरामा आधारित पुरानो सम्बन्ध अब समाप्त भएको बताएका छन् ।

राजधानी ओटावामा भएको मन्त्रिपरिषद् बैठकपछि बोल्दै उनले अमेरिकी राष्ट्रपति डोनाल्ड ट्रम्पको कर निर्णयले क्यानेडियालीहरूलाई आफ्नो अर्थतन्त्रमा पुनर्विचार गर्न बाध्य पार्ने बताए।

मार्क कार्नीले क्यानडाले प्रतिशोधात्मक कर लगाउने बताए जसको अमेरिकामा “अधिकतम प्रभाव” पर्नेछ।

ट्रम्पले बुधबार आयातित सवारी साधन र सवारी साधनका पार्टपुर्जामा २५ प्रतिशत कर लगाउने घोषणा गरे। यो स्थायी भएको पनि उनले बताए ।

कार्नीले क्यानडा र संयुक्त राज्य अमेरिका बीचको १९६५ को अटोमोटिभ उत्पादन सम्झौतालाई अहिलेसम्मकै सबैभन्दा महत्त्वपूर्ण सम्झौता भने र यी शुल्कहरूसँगै यो सम्झौता हटेको बताए।

यद्यपि, कार्नीका अनुसार ट्रम्पको कार्यालयबाट फोन वार्ताको तालिका बनाउने प्रस्ताव आएको छ र सम्भव छ कि दुई नेताहरू बीच चाँडै वार्ता हुन सक्छ।

यदि यसो भयो भने कार्नी प्रधानमन्त्री बनेपछि ट्रम्प र कार्नीबीच फोनमा कुराकानी भएको यो पहिलो पटक हुनेछ। क्यानडामा अर्को महिना आम चुनाव हुँदैछ।