काठमाडौं । भारत र अमेरिकाबीच भन्सार शुल्कको बारेमा व्यापार वार्ता भइरहेको छ। यसैबीच अमेरिकी राष्ट्रपति डोनाल्ड ट्रम्पले एप्पलका सीईओ टिम कुकलाई भारतमा एप्पलका सामानहरू उत्पादन गर्न रोक लगाएका छन्। ट्रम्पले भने ‘तपाईंले भारतमा एप्पलका उत्पादनहरू बनाउनुहोस् भन्ने मेरो चाहना छैन, उनीहरूले आफ्नो आवश्यकताको चिन्ता आफैं गर्छन् ।’

यसबाहेक ट्रम्पले भारतले धेरै अमेरिकी उत्पादनहरूमा शून्य कर लगाउने प्रस्ताव गरेको समेत दाबी गरेका छन् । रोयटर्सको रिपोर्ट अनुसार अमेरिकी राष्ट्रपति डोनाल्ड ट्रम्पले भने ‘भारतले अमेरिकी सामानहरूमा कर घटाउने प्रस्ताव गरेको छ किनकि भारतले आयात करमा सम्झौता चाहन्छ।’

बिहीबार कतारमा व्यापारिक नेताहरूसँगको एक कार्यक्रममा बोल्दै अमेरिकी राष्ट्रपति डोनाल्ड ट्रम्पले भने ‘भारत सरकारले हामीलाई एउटा सम्झौताको प्रस्ताव गरेको छ जस अन्तर्गत उनीहरू मूलतः हामीबाट कुनै पनि शुल्क नलिने सम्झौता गर्न इच्छुक छन्।’

उनले वासिङ्टन र नयाँ दिल्लीबीच जारी व्यापार वार्तामा प्रगति भएको संकेत गरे। एक दिन अघि मिशिगनमा बोल्दै ट्रम्पले भारतसँगको भन्सार वार्ता धेरै राम्रोसँग चलिरहेको बताएका थिए। उनले वार्ता चाँडै नै सम्झौता सम्पन्न हुने पनि बताएका थिए ।

डोनाल्ड ट्रम्पले भने ‘नयाँ दिल्लीको उच्च शुल्कले भारतमा अमेरिकी व्यवसायलाई बाधा पुर्‍याउँछ।’ उनले एप्पलका सीईओ टिम कुकलाई भारतमा उत्पादन नगर्न आग्रह गरे। उनको संकेत अमेरिकामा भइरहेको एप्पलको उत्पादनप्रतिको इशारा थियो।

डोनाल्ड ट्रम्पको आक्रामक ट्यारिफ अभियानको उद्देश्य अमेरिकी व्यापार घाटा कम गर्नु र घरेलु उत्पादन बढाउनु हो। यो भन्सार शुल्कका कारण भारतीय निर्यातकर्ताहरू, विशेष गरी समुद्री खाना र धातु निर्यात सबैभन्दा बढी प्रभावित भएका छन्।