काठमाडौं । अमेरिकी राष्ट्रपति डोनाल्ड ट्रम्पले रुस र युक्रेनले युद्धविराम र अझ महत्त्वपूर्ण कुरा युद्धको अन्त्यको लागि “तुरुन्तै” वार्ता सुरु गर्ने बताएका छन्।

ट्रम्पले आफ्नो ट्रुथ सोशल अकाउन्टमा जानकारी दिएअनुसार उनले सोमबार रुसी राष्ट्रपति भ्लादिमिर पुटिनसँग दुई घण्टा कुराकानी गरेका थिए। ट्रम्पका अनुसार पुटिनसँगको उनको कुराकानी ‘धेरै राम्रो’ रह्यो।

“रूस र युक्रेनले तुरुन्तै युद्धविरामको लागि वार्ता सुरु गर्नेछन् र अझ महत्त्वपूर्ण कुरा, युद्धको अन्त्य गर्नेछन्, जसका सर्तहरू दुई पक्षहरू बीचको सहमतिले निर्धारण गरिनेछ,” ट्रम्पले लेखे।

ट्रम्पले यसबारे युक्रेनी राष्ट्रपति भोलोडिमिर जेलेन्स्कीलाई जानकारी गराएको बताए।

यसबाहेक ट्रम्पले युरोपेली आयोगका अध्यक्ष उर्सुला भोन डेर लेयन, फ्रान्सेली राष्ट्रपति इमानुएल म्याक्रोन, इटालीका प्रधानमन्त्री जर्जिया मेलोनी, जर्मन चान्सलर फ्रेडरिक मेर्ट्ज र फिनल्याण्डका राष्ट्रपति अलेक्ज्याण्डर स्टबलाई यसबारे जानकारी गराएका छन्।

पुटिनले शान्तिको लागि रुस युक्रेनसँग ‘सम्झौता’ बारे छलफल गर्न तयार रहेको बताएका छन्। यद्यपि, उनले यस सम्झौतामा के-कस्ता कुराहरू समावेश हुनेछन् भन्ने कुरा स्पष्ट पारेनन्। उनका अनुसार उनी ‘संकटको मूल कारण’ लाई सम्बोधन गर्न चाहन्छन्।

युक्रेनी राष्ट्रपति जेलेन्स्कीले युद्ध अन्त्य गर्न युक्रेन, रुस, अमेरिका, युरोपेली संघ देशहरू र बेलायतबीच ‘उच्च-स्तरीय’ बैठक गर्ने विचार गरिरहेको सुझाव दिए।

जेलेन्स्कीले अमेरिकालाई यी छलफलहरूबाट आफूलाई टाढा नराख्न पनि अपील गरे। उनले भने कि ‘रूसले पनि अर्थपूर्ण वार्तामा संलग्न हुन तत्परता देखाउनु आवश्यक छ’।