काठमाडौं । भारतको उड्डयन नियामक नागरिक उड्डयन महानिर्देशनालय (डीजीसीए) ले शुक्रबार इन्डिगो एयरलाइन्सको विमान एयर टर्ब्युलेन्समा फसेको सम्बन्धमा एक विज्ञप्ति जारी गरेको छ।

समाचार एजेन्सी पीटीआईका अनुसार डीजीसीएले भनेको छ ‘मे २१ मा पठानकोट नजिकै विमान उडिरहेको बेला अचानक मौसम खराब भयो।’

मौसमको अवस्थाका कारण उडान नम्बर ६ इ-२१४२ का चालक दलले लाहोरलाई सम्पर्क गरेर पाकिस्तानी हवाई क्षेत्र प्रयोग गर्न अनुरोध गरे तर त्यो अस्वीकार गरियो।

दिल्लीबाट श्रीनगर उडान गरिरहेको इन्डिगो एयरलाइन्सको चालक दलले अनुमति नपाएपछि सबै प्रोटोकल पालना गर्दै खराब मौसमको बीचमा विमानलाई श्रीनगरमा सुरक्षित अवतरण गराए।

डीजीसीएले आफ्नो विज्ञप्तिमा भनेको छ – विमानमा सवार कुनै पनि यात्रु घाइते भएका छैनन् तर विमानको अगाडिको भाग, “नोज रेडोम” मा क्षति पुगेको छ। यस विमानमा २२७ जना यात्रु थिए।