काठमाडौं । साउदी अरेबियाका अधिकारीहरूले सोमबार राज्यले मदिरामाथिको प्रतिबन्ध हटाउने तयारी गरेको भन्ने रिपोर्टहरूको खण्डन गरेका छन्। साउदी अधिकारीहरूले मदिरा सम्बन्धी साउदी अरेबियाको नीतिमा कुनै परिवर्तन नभएको बताएका छन्।

साउदी अरेबियाले ७३ वर्ष पुरानो मदिरामाथिको प्रतिबन्ध हटाउने दाबी गरिएको समाचार पहिलो पटक वाइन ब्लगमा प्रकाशित भएको थियो। यद्यपि, यो समाचार कुनै स्रोत बिना नै दिइएको थियो। यसपछि अन्तर्राष्ट्रिय सञ्चारमाध्यमले पनि यो समाचार प्रकाशित गर्दै साउदी अरेबियाले २०३४ को फिफा विश्वकप आयोजना गर्ने तयारी गरिरहेको र यसै क्रममा मदिरामाथिको प्रतिबन्ध हटाउन लागेको बताएका छन्।

प्रतिबन्ध हटाइएपछि साउदी अरेबियामा मदिराको बिक्री निश्चित क्षेत्रहरूमा सीमित हुनेछ भनी रिपोर्टहरूमा उल्लेख छ। रिपोर्टमा यो वाइन राज्यभरि ६०० स्थानहरूमा बिक्री गरिनेछ, जसमा मुख्यतया विलासी होटल, रिसोर्ट र पर्यटकहरूलाई सेवा प्रदान गर्ने पर्यटकीय स्थलहरू समावेश छन्। साउदी अरेबियाको नवनिर्मित निओम शहर, सिन्धला र रेड सी प्रोजेक्ट केही त्यस्ता ठाउँहरू हुन् जहाँ मदिरा बिक्री गर्न अनुमति दिइनेछ।