काठमाडौं । पूर्वप्रधानमन्त्री एवं नेकपा एकीकृत समाजवादीका अध्यक्ष माधवकुमार नेपालले आफूमाथि लगाइएको भ्रष्टाचार आरोप षड्यन्त्रपूर्ण भएको बताएका छन्।

अख्तियार दुरुपयोग अनुसन्धान आयोगले विशेष अदालतमा मुद्दा दायर गरेपछि रौतहटमा रहेका नेपालले पत्रकारहरूसँग भ्रष्टाचार आरोप आफूमाथिको प्रतिशोधपूर्ण कदम भएको बताएका हुन्।

‘मैले कुनै अनुचित काम गरेको छैन। तर, कानुनी प्रक्रियाको सामना गर्ने छु। मविरुद्ध सुरुदेखि नै षड्यन्त्र भइरहेको थियो। राजनीतिक जीवन समाप्त पार्ने नियतले मुद्दा चलाइएको हो,’ उनले भने।

आफूले ‘नबिराउनु, नडराउनु’ को मान्यतालाई आत्मसात् गरेको उनको भनाइ छ। उनले कुनै पनि अनुचित काम नगरेको र त्यस्ता कार्यलाई प्रोत्साहनसमेत नगरेको दाबी गरेका छन्।