काठमाडौं । सुरक्षा खतराका कारण बगदादस्थित अमेरिकी दूतावासका गैर-अत्यावश्यक कर्मचारी र अन्य कर्मचारीहरूले इराक छोड्दै गरेको अमेरिकी सरकारी स्रोतहरूले बुधबार बताएका छन्।

अधिकारीहरूले इराक छोड्नुको कारण के थियो भनेर स्पष्ट बताएनन्। तर इरानको आणविक कार्यक्रमका विषयमा हालै भइरहेको वार्ता रोकिनु यसको एउटा कारण हुन सक्छ।

अमेरिकी विदेश विभागका एक अधिकारीले बीबीसीलाई भने “हामी हाम्रा सबै दूतावासहरूमा उपयुक्त कर्मचारी स्थितिको मूल्याङ्कन गरिरहेका छौं।”

उनले अगाडि भने “पछिल्लो विश्लेषणको आधारमा हामीले इराकमा हाम्रो उपस्थिति घटाउने निर्णय गरेका छौं।” इरानसँग धेरै हप्ताको वार्तापछि अमेरिकाले यो कदम चालेको हो।

अमेरिकी राष्ट्रपति डोनाल्ड ट्रम्पले इरानलाई आणविक हतियार विकास गर्नबाट रोक्न सम्झौतामा पुग्ने आशा व्यक्त गरेका थिए। तर, ट्रम्पले बुधबार इरानले युरेनियम संवर्धन बन्द गर्नेछ भन्ने कुरामा उनी कम विश्वस्त हुँदै गइरहेको बताएका थिए ।

यस हप्ताको सुरुमा ट्रम्पले इजरायली प्रधानमन्त्रीसँग ४० मिनेटको फोन वार्ता पनि गरेका थिए। यो वार्तालाई ‘तनावपूर्ण’ भनिएको छ।

अमेरिकी राष्ट्रपति डोनाल्ड ट्रम्पले बुधबार एक पोडकास्टमा बताएअनुसार इरानको आणविक कार्यक्रममा कुनै पनि सम्झौता हुन सक्छ भन्नेमा उनलाई कम विश्वास छ।

अमेरिका इरानले आणविक बम बनाउन प्रयोग गर्न सकिने युरेनियमको संवर्धन बन्द गरोस् भन्ने चाहन्छ। यसको बदलामा अमेरिकाले इरानमाथिको आर्थिक प्रतिबन्धहरू खुकुलो पार्नेछ।

यसैबीच, इरानका रक्षामन्त्री अजिज नासिरजादेहले भने ‘यदि वार्ता सफल भएन र ट्रम्पले इरान विरुद्ध सैन्य आक्रमणको आदेश दिए भने इरानले यस क्षेत्रमा रहेका अमेरिकी अड्डाहरू विरुद्ध बदला लिनेछ।’

समाचार एजेन्सी रोयटर्सले अमेरिकी रक्षामन्त्री पिट हेगसेथले कुवेत र बहराइन लगायत मध्यपूर्व देशहरूबाट अमेरिकी सैन्य कर्मचारीका परिवारहरूलाई फिर्ता पठाउन अनुमति दिएको रिपोर्ट गरेको छ।

बुधबार कंग्रेसनल प्यानललाई हेग्सेथले इरान “आणविक हतियारको नजिक पुग्ने कुरातर्फ अघि बढिरहेको” “धेरै संकेतहरू” रहेको विश्वास व्यक्त गरे।

यद्यपि, इरानले आफ्नो युरेनियम संवर्धन कार्यक्रम ऊर्जा उत्पादनको लागि भएको र आणविक बम बनाउने प्रयास नगरेको बताएको छ।

बुधबार नै, बेलायतको सामुद्रिक व्यापार संगठनले मध्य पूर्वमा बढ्दो सैन्य तनावले ढुवानीलाई असर गर्न सक्ने चेतावनी जारी गर्‍यो। यो संगठन बेलायतको जलसेना रोयल नेवीको एक हिस्सा हो ।

अर्कोतर्फ, अमेरिकी दूतावासले यो कदम चालेको खबर बाहिर आएपछि तेलको मूल्य चार प्रतिशतभन्दा बढीले बढेको छ। यस क्षेत्रमा रहेको असुरक्षाका कारण आपूर्ति सम्बन्धी समस्या हुने सम्भावना छ। मध्य पूर्व विश्वको एक महत्वपूर्ण तेल आपूर्तिकर्ता क्षेत्र हो।

इराकमा लगभग २,५०० अमेरिकी सेना तैनाथ छन्। इरानमाथि सम्भावित इजरायली आक्रमणको आशंकामा अमेरिकाले इराकबाट केही कर्मचारीहरूलाई बाहिर निकाल्न अनुमति दिएको वासिङ्टन पोस्टले बुधबार रिपोर्ट गरेको छ।

यसबाहेक, पेन्टागनले मध्यपूर्वमा रहेका सैन्य परिवारका सदस्यहरूको फिर्तालाई हरियो संकेत दिएको छ।

अमेरिकी उपराष्ट्रपति जेडी भान्सले बुधबार केनेडी सेन्टरमा बताएअनुसार इरान आणविक हतियार चाहन्छ कि चाहँदैन भन्ने कुरा उनलाई थाहा छैन।

यसपछि, यस जानकारीसँग सम्बन्धित एक स्रोतले द जेरुसेलम पोस्टलाई बताएअनुसार आणविक कार्यक्रमको बारेमा अमेरिका र इरानबीच छैटौं चरणको वार्ता हुने सम्भावना कम छ।

यस सम्बन्धमा सोधिएको प्रश्नको जवाफ दिँदै अमेरिकी राष्ट्रपति डोनाल्ड ट्रम्पले सबैलाई चाँडै थाहा हुने बताए।

यद्यपि, उनले पछि भने, “अमेरिकी कर्मचारीहरू मध्य पूर्व छोड्दैछन्। यो खतरनाक ठाउँ हुन सक्छ। हामी हेर्नेछौं के हुन्छ। इरानसँग आणविक हतियार हुन सक्दैन। हामी यो हुन दिने छैनौं।”

यसैबीच, अमेरिका र इरानबीच आणविक कार्यक्रममा भएको छैटौं चरणको वार्ताबारे एक स्रोतले द टाइम्स अफ इजरायललाई बताएअनुसार बैठक कहिल्यै पुष्टि भएन र अहिले पनि अवस्था उस्तै छ।

राष्ट्रपति ट्रम्पले इरानसँगको वार्तामा सफलताको आशा कम रहेको पनि संकेत गरेका छन्। उनले न्यूयोर्क पोस्टको ‘पोड फोर्स वान’ पोडकास्टलाई भनेअनुसार उनी यस सम्झौताको बारेमा कम विश्वस्त छन्।

सोमबार एक अन्तर्वार्तामा ट्रम्पले भनेका थिए, “उनीहरूले ढिलाइ गरिरहेका छन्। मलाई लाग्छ यो लज्जास्पद छ। म केही महिना अघि जस्तो विश्वस्त छैन। उनीहरू (इरान) लाई केही भएको छ।”

द टाइम्स अफ इजरायलका अनुसार इरानका रक्षामन्त्री अजिज नासिरजादेहले बुधबार पत्रकारहरूलाई संयुक्त राज्य अमेरिकासँगको वार्ताले नतिजा ल्याउने अपेक्षा गरेको बताए।

उनले भने, “यदि हामीमाथि द्वन्द्व लादियो भने, स्पष्ट रूपमा विपक्षी पक्षले हामीभन्दा बढी क्षति भोग्नेछ। यस अवस्थामा अमेरिकाले यो क्षेत्र छोड्नुपर्छ। हामीसँग उनीहरूका सबै अड्डाहरूमा पहुँच छ र हामी ती सबै अड्डाहरूलाई लक्षित गर्नेछौं।”

यसैबीच, अमेरिकी राष्ट्रपति डोनाल्ड ट्रम्पले ट्रुथ सोसलमा एक पोस्टमा आणविक सम्झौता नभए इरानमाथि बम विष्फोट गर्ने चेतावनी दिएका छन्।

उनले लेखे, “आगामी दिनहरूमा अमेरिकी सेनाले आफ्नो गौरव देखाउनेछ। तिमी (सेना) अमेरिकी माटोको प्रत्येक इन्चको रक्षा गर्नेछौ। तिमीले पृथ्वीको हरेक कुनासम्म अमेरिकाको रक्षा गर्नेछौ।”