काठमाडऔ । फ्रान्सेली राष्ट्रपति इमानुएल म्याक्रोंले आफ्नो देशले यस वर्ष सेप्टेम्बरमा प्यालेस्टाइनलाई आधिकारिक रूपमा मान्यता दिने बताएका छन्।

राष्ट्रपति म्याक्रोंले सामाजिक सञ्जाल प्लेटफर्म एक्समा लेखे – यसको औपचारिक घोषणा न्यूयोर्कमा हुने संयुक्त राष्ट्र संघको महासभाको सत्रमा गरिनेछ।

उनले लेखे, “आजको सबैभन्दा जरुरी आवश्यकता गाजामा युद्ध अन्त्य गर्नु र सर्वसाधारणको सुरक्षा गर्नु हो। शान्ति सम्भव छ। हामीलाई तत्काल युद्धविराम, सबै बन्धकहरूको रिहाइ र गाजाका जनतालाई ठूलो मात्रामा मानवीय सहायता चाहिन्छ।”

प्यालेस्टिनी अधिकारीहरूले म्याक्रोनको निर्णयको स्वागत गरे, तर इजरायली प्रधानमन्त्री बेन्जामिन नेतान्याहूले यो कदमको आलोचना गर्दै भने – “यो आतंकवादलाई पुरस्कृत गर्नु बराबर हो।”

बिहीबार आफ्नो पोस्टमा म्याक्रोंले लेखे: “मध्य पूर्वमा न्यायपूर्ण र दिगो शान्तिको लागि मेरो ऐतिहासिक प्रतिबद्धताको अंशको रूपमा, मैले फ्रान्सले प्यालेस्टाइनलाई एक राज्यको रूपमा मान्यता दिने निर्णय गरेको छु।”

उनले भने, “हामीले हमासको निशस्त्रीकरण सुनिश्चित गर्नुपर्छ, साथै गाजाको सुरक्षा र पुनर्निर्माण पनि सुनिश्चित गर्नुपर्छ।”

हाल, प्यालेस्टाइनलाई संयुक्त राष्ट्र संघका १९३ सदस्य राष्ट्रहरूमध्ये १४० भन्दा बढीले मान्यता दिएका छन्।

स्पेन र आयरल्याण्ड लगायत केही युरोपेली संघका देशहरू पनि यसमा समावेश छन्।

तर इजरायलका मुख्य समर्थकहरू, संयुक्त राज्य अमेरिका र बेलायत लगायत उसका सहयोगीहरूले प्यालेस्टाइनलाई मान्यता दिएका छैनन्।