काठमाडौं । दक्षिणी फ्रान्सको केही भागमा लागेको जंगलको आगलागीमा परी एक वृद्ध महिलाको मृत्यु भएको छ भने एक जना बेपत्ता भएको बताइएको छ।

यो आगलागी मंगलबार औडे क्षेत्रको ला रिबोउटे गाउँ नजिकै लागेको थियो। यस वन आगलागीमा अहिलेसम्म १३ हजार हेक्टर (५० वर्ग माइल) भन्दा बढी क्षेत्रफल जलेको छ।

धेरै घरहरू ध्वस्त भएका छन् र हजारौं मानिसहरू विस्थापित भएका छन्। उक्त क्षेत्रमा १,८०० भन्दा बढी अग्नि नियन्त्रकहरू र ५०० सवारी साधनहरू परिचालन गरिएको छ।

अधिकारीहरूले बताएअनुसार ती वृद्ध महिलाको उनको घरमै मृत्यु भएको हो।

धुवाँ निस्सासिएर सात जना अग्निनियन्त्रकहरूको उपचार गरिएको थियो। दुई जनालाई अस्पताल भर्ना गरिएको थियो, जसमध्ये एक जनाको अवस्था गम्भीर छ।