काठमाडौं । आइतबार अमेरिकाको न्यूयोर्कको ब्रुकलिनमा रहेको एक होटलमा धेरै बन्दुकधारीहरूले मानिसहरूमाथि गोली चलाउँदा ३ जनाको मृत्यु भएको छ भने ८ जना घाइते भएका छन्।

ब्रुकलिन प्रहरी आयुक्तका अनुसार यो घटना आपसी विवादपछि भएको हो। मृतक तीनै जना पुरुष हुन्। घाइतेहरूलाई तुरुन्तै नजिकैका अस्पतालहरूमा भर्ना गरिएको थियो, जहाँ उनीहरूको अवस्था गम्भीर रहेको छ।

प्रहरीले अभियुक्तको खोजी गरिरहेको छ, तर अहिलेसम्म कसैलाई पनि पक्राउ गरिएको छैन। घटनास्थलबाट ३६ वटा कारतूस र एउटा बन्दुक बरामद भएको छ। प्रहरीले सीसीटीभीको सहयोगमा प्रमाण सङ्कलन गरिरहेको छ।

सुटिङ भएको होटलको नाम ‘टेस्ट अफ द सिटी लाउन्ज’ हो। यो २०२२ मा खोलिएको थियो र अमेरिकी र क्यारिबियन खाना, हुक्का, बार र डीजे संगीतको लागि प्रसिद्ध छ।

सामाजिक सञ्जालमा भाइरल भएको भिडियोमा रेस्टुरेन्ट भित्र रगतका दाग र फुटेको सिसा छरिएको देखिन्छ।