ललितपुर । ललितपुरको कोन्ज्योसोम गाउँपालिका ४ नल्लुमा चार जना स्थानीय नेता नेपाल कम्युनिस्ट पार्टी परित्याग गरी नेपाली कांग्रेसमा प्रवेश गरेका छन्।

आइतबार आयोजित चुनावी कार्यक्रममा नेपाली कांग्रेसका सहमहामन्त्रीसमेत रहेका प्रतिनिधि सभा निर्वाचनमा ललितपुर–१ का उम्मेदवार उदयशमशेर राणाले नेकपाको सक्रिय राजनीति गरेका चार नेतालाई पार्टी प्रवेश गराएका हुन्।

कांग्रेस प्रवेश गर्नेहरूमा नेकपा पूर्व वडा कमिटी अध्यक्ष शेरबहादुर स्याङ्ताङ, नेकपा एमालेका पूर्व वडा कमिटी अध्यक्ष प्रताप स्याङ्ताङ, नेकपा माओवादीका सक्रिय सदस्यहरू साहिला स्याङ्ताङ र राजु स्याङ्ताङ छन्।

उनीहरूलाई पार्टी प्रवेश गराउँदै राणाले नल्लुसहित कोन्ज्योसोम क्षेत्रको विकास र समृद्धिका लागि कांग्रेस निरन्तर प्रतिबद्ध रहेको बताए। उनले पुराना र अनुभवी नेताहरूको आगमनले पार्टीलाई थप ऊर्जा मिलेको र यसले आगामी निर्वाचनको अंक गणितमा समेत दूरगामी प्रभाव पार्ने जिकिर गरे।

पार्टी प्रवेशपछि बोल्दै नेताहरूले वामपन्थी दलहरूमा बढ्दो साङ्गठनिक विचलन र जनताप्रतिको उत्तरदायित्व कम हुँदै गएकाले आफूहरूले विकल्प रोजेको बताए। उनीहरूले नेपाली कांग्रेसको लोकतान्त्रिक कार्यशैली, विकासमुखी दृष्टिकोण र जनतासँग प्रत्यक्ष जोडिने संस्कृतिका कारण आफूहरू आकर्षित भएको उल्लेख गरे।

सो स्थानमा एमाले र माओवादीका पूर्व वडा अध्यक्षस्तरका नेताहरूले सामूहिक रूपमा पार्टी छाड्नुले कोन्ज्योसोममा वामपन्थी आधार खस्किँदै गएको संकेत गर्दछ। यसले आगामी दिनमा कांग्रेसको साङ्गठनिक शक्तिलाई थप मजबुत बनाउने र शक्ति सन्तुलनमा ठूलो फेरबदल ल्याउने निश्चित देखिन्छ।

कोन्ज्योसोम क्षेत्रमा राजनीतिक ध्रुवीकरण पुनः परिभाषित भइरहेका बेला कांग्रेसले पाएको यो पछिल्लो थप बल रणनीतिक रूपमै लाभदायी मानिएको कांग्रेस नेताहरू बताउँछन्।