काठमाडौं। नदी जोगाउँदै साहसिक पर्यटन प्रवद्र्धन गर्ने सन्देश दिने उद्येश्यले आगामी फागुन १४ देखि १६ गतेसम्म २४ औं हिमालयन ह्वाइटवाटर च्यालेञ्ज सुरु हुन लागेको छ।

हिमालयन ह्वाइटवाटर च्यालेञ्ज तथा ५०औं अन्तरराष्ट्रिय ह्वाइटवाटर र्‍याफ्टिङ र कायाकिङ महोत्सव यसपटक केवल प्रतिस्पर्धामा सीमित नभई नदी संरक्षण र दिगो साहसिक पर्यटन प्रवद्र्धनको सन्देश बोकेर अघि बढेको आयोजकले जनाएको छ। नेपाल एशोसिएसन अफ र्‍याफ्टिङ एजेन्सिज (नारा) ले नेपाल पर्यटन बोर्डसँगको सहकार्यमा आयोजना गर्ने महोत्सवमा ३० अन्तरराष्ट्रिय र १४० राष्ट्रिय खेलाडी सहभागी हुने जनाएको छ।

नाराकाअनुसार तीन दिनसम्म सञ्चालन हुने प्रतियोगितामा कायाकिङका दुई र र्‍याफ्टिङको एक विधामा प्रतिस्पर्धा हुनेछ। नेपाल पर्यटन बोर्डका वरिष्ठ निर्देशक हिक्मतसिंह ऐरले हिमाल मात्र होइन, नदीजन्य साहसिक गतिविधिलाई पनि नेपालको अन्तरराष्ट्रिय पर्यटन पहिचानका रूपमा स्थापित गर्नुपर्ने बताए। उनले नदी संरक्षणबिना साहसिक पर्यटनको भविष्य सुरक्षित नहुने उल्लेख गरे।

यस्तै, बोर्डका उपाध्यक्ष रामप्रसाद सापकोटाले जलविद्युत् आयोजना र नदीजन्य उत्खननले नदीमा आधारित साहसिक खेलमा प्रत्यक्ष असर पारिरहेको बताए। उनले सरकारलाई जलविद्युत् र पर्यटनका लागि उपयुक्त नदी छुट्याएर दिगो व्यवस्थापनको नीति लिन आग्रह गरे।

नाराका अध्यक्ष कमलबहादुर ठकुरीका अनुसार यो महोत्सव नेपालको ५० वर्षे जलयात्रा इतिहासको उत्सवसमेत हो। सन् १९६० को दशकदेखि सुरु भएको नेपालमा र्‍याफ्टिङको यात्रा सन् १९७५ मा व्यावसायिक रूपमा विस्तार भएको थियो। त्यसयता नदीले साहसिक पर्यटनमा महत्वपूर्ण योगदान दिँदै आएको छ।

आयोजकका अनुसार महोत्सवअन्तर्गत पहिलो दिन १०० भन्दा बढी कायकरबीच प्रतिस्पर्धा हुनेछ भने दोस्रो दिन नकआउट चरण सञ्चालन हुनेछ। तेस्रो दिन र्‍याफ्टिङ सत्र आयोजना गरिनेछ। साथै नेपालमा व्यावसायिक र्‍याफ्टिङको सुरुआत गर्ने संस्थापकलाई विशेष सम्मान गरिने कार्यक्रमसमेत तय गरिएको छ।

यसपटकको महोत्सवले प्रतिस्पर्धाभन्दा पर गएर ‘नदी जोगाऔँ, पर्यटन बढाऔँ’ भन्ने सन्देश अन्तरराष्ट्रिय समुदायसम्म पुर्‍याउने अपेक्षा गरिएको छ।