काठमाडौं । काभ्रेपलाञ्चोकको धुलिखेल अस्पतालमा उपचारका क्रममा सुत्केरी महिला र नवजात शिशुको मृत्यु भएपछि स्थिति तनावग्रस्त बनेको छ। आक्रोशित बिरामीका आफन्तले अस्पतालका कर्मचारी सूर्य प्रकाश श्रेष्ठमाथि निर्घात कुटपिट गरेका छन्।

चिकित्सकको लापरवाहीका कारण बेथानचोक गाउँपालिका–१ की सुत्केरी महिला र शिशुको मृत्यु भएको मृतकका आफन्तको आरोप छ। अस्पतालको आईसीयूमा उपचारकै क्रममा दुवैको मृत्यु भएपछि मृतकका आफन्तले अस्पताल परिसरमा नाराबाजी र प्रदर्शन गरेका हुन्।

आफन्तको कुटपिटबाट घाइते भएका कर्मचारी श्रेष्ठको सोही अस्पतालमा उपचार भइरहेको छ। घटनापछि अस्पताल प्रशासन र पीडित पक्षबीच वार्ताको प्रयास भइरहे पनि हाल अस्पतालको अवस्था निकै तनावग्रस्त रहेको छ। सुरक्षा अवस्थालाई ध्यानमा राख्दै अस्पताल परिसरमा ठूलो सङ्ख्यामा प्रहरी परिचालन गरिएको छ।