काठमाडौं। हाल नेपालको उपल्लो वायुमण्डलमा पश्चिमी न्यून चापीय रेखाका साथै स्थानीय वायुको आंशिक प्रभाव देखिएकाले देशका विभिन्न भूभागमा मौसममा फेरबदल भइरहेको छ।

जल तथा मौसम विज्ञान विभागका अनुसार अहिले कोशी, बागमती र गण्डकी प्रदेशका साथै लुम्बिनी, कर्णाली र सुदूरपश्चिम प्रदेशका हिमाली तथा पहाडी क्षेत्रमा साधारणतया बदली रहेको छ भने बाँकी भूभागमा आंशिक बादल लागेको छ। यसै प्रभावका कारण कोशी, बागमती, गण्डकी र लुम्बिनी प्रदेशका थोरै स्थानहरूमा अहिले मेघगर्जन र चट्याङ्गसहित हल्कादेखि मध्यम वर्षा भइरहेको छ।

आज दिउँसो कोशी, मधेश, बागमती, गण्डकी र लुम्बिनी प्रदेशसहित देशका हिमाली तथा पहाडी भूभागमा साधारणतया बादल लाग्ने अनुमान गरिएको छ भने सुदूरपश्चिम प्रदेशको तराई क्षेत्रमा आंशिक बदली हुनेछ।

दिउँसोको समयमा कोशी, मधेश, बागमती र गण्डकी प्रदेशका साथै लुम्बिनी प्रदेशको हिमाली र पहाडी भूभागका थोरै स्थानहरूमा वर्षाको सम्भावना छ। यसका साथै लुम्बिनीको तराई क्षेत्र, कर्णाली र सुदूरपश्चिम प्रदेशका हिमाली तथा पहाडी भूभागका एक-दुई स्थानमा मेघगर्जन र चट्याङसहित मध्यम खालको वर्षा र उच्च हिमाली क्षेत्रमा हिमपातको सम्भावना रहेको छ।

पहाडी क्षेत्रमा वर्षाको सम्भावना रहे पनि बागमती, गण्डकी, लुम्बिनी र सुदूरपश्चिम प्रदेशका तराई भूभागका केही स्थानहरूमा भने अत्यधिक गर्मी भई तातो दिन हुने सम्भावना रहेकाले सचेत रहन आग्रह गरिएको छ।

आज राति कोशी प्रदेशसहित बागमती र गण्डकी प्रदेशको हिमाली तथा पहाडी भूभाग र बाँकी हिमाली क्षेत्रमा साधारणतया बादल लाग्ने प्रक्षेपण गरिएको छ। मधेश प्रदेश र अन्य प्रदेशका पहाडी भूभागमा आंशिक बदली रहे पनि बाँकी तराईका क्षेत्रमा भने मौसम मुख्यतया सफा रहनेछ।

रातिको समयमा कोशी प्रदेशसहित बागमती र गण्डकी प्रदेशको हिमाली तथा पहाडी भूभागका थोरै स्थानहरूमा र मधेश प्रदेशका साथै अन्य हिमाली क्षेत्रका एक-दुई स्थानमा मेघगर्जन र चट्याङ्गसहित हल्का वर्षा र हिमपातको सम्भावना रहेको मौसम पूर्वानुमान महाशाखाले जनाएको छ।