काठमाडाैं। फिफा विश्वकप फुटबल-२०२६ अन्तर्गत समूह ‘सी’ को रोमाञ्चक भिडन्तमा मोरक्कोले स्कटल्यान्डमाथि १-० को महत्वपूर्ण जित दर्ता गरेको छ।

अमेरिकाको बोस्टन स्टेडियममा शनिबार बिहान सम्पन्न खेलमा मोरक्कोले खेलको सुरुवाती समयमै बनाएको अग्रतालाई अन्तिम समयसम्म जोगाउँदै स्पष्ट ३ अंक जोड्न सफल भएको हो। यो जितसँगै मोरक्को प्रतियोगिताको नकआउट चरण (अन्तिम १६) मा प्रवेश गर्ने बलियो सम्भावनासहित अंक तालिकाको शीर्ष स्थानमा उक्लिएको छ।

खेलको सुरुवातमै मोरक्कोले आक्रामक रणनीति अपनाएको थियो, जसको नतिजा दोस्रो मिनेटमै देखियो। स्टार खेलाडी ब्राहिम डियाजले मिलाइदिएको उत्कृष्ट र सटिक पासलाई सदुपयोग गर्दै इस्माइल साइबारीले उत्कृष्ट गोल गरे। साइबारीको यही प्रारम्भिक प्रहार नै अन्ततः मोरक्कोका लागि निर्णायक सावित भयो।

पहिलो गोल खाएपछि दबाबमा परेको स्कटल्यान्डले खेलमा फर्कनका लागि केही राम्रा अवसरहरू सिर्जना गरे पनि मोरक्कोको मजबुत रक्षापंक्ति र गोलरक्षकलाई भेद्न सकेन। पहिलो खेलमा हाइटीलाई पराजित गरेर उच्च मनोबलमा रहेको स्कटल्यान्डले दोस्रो हाफमा थप आक्रामक खेल पस्किए पनि गोल गर्न असफल रहँदा पराजय व्यहोर्नु पर्यो।

यो नतिजापछि समूह ‘सी’ मा मोरक्कोले २ खेलबाट ४ अंक जोड्दै आफूलाई शीर्ष स्थानमा उभ्याएको छ। यसअघि आफ्नो पहिलो खेलमा मोरक्कोले बलियो प्रतिद्वन्द्वी ब्राजिललाई बराबरीमा रोक्दै १ अंक बाँडेको थियो। यता पराजित स्कटल्यान्ड भने २ खेलमा १ जित र १ हारसहित ३ अंकका साथ तालिकाको दोस्रो स्थानमा छ।

समूहको अन्य समीकरण हेर्दा, एक खेल खेलेको ब्राजिल १ अंकसहित तेस्रो स्थानमा छ भने पहिलो खेलमा पराजित हाइटी अंकविहीन रहँदै पुछारमा छ। यसै समूह अन्तर्गत ब्राजिल र हाइटीबीचको अर्को खेल केही बेरमा सुरु हुँदैछ, जसले यस समूहको नकआउट दौडलाई थप रोचक बनाउने देखिन्छ।