काठमाडौं । फिफा विश्वकप २०२६ को समूह चरण अन्तर्गत भएका खेलहरूमा केही अप्रत्याशित र ऐतिहासिक नतिजाहरू बाहिर आउने क्रम जारी छ। यसै सिलसिलामा समूह ‘आइ’ मा रहेको अफ्रिकी महादेशको बलियो टोली सेनेगलले सुरुवाती लगातार दुई खेलमा पराजय बेहोरेर पनि प्रतियोगिताको नकआउट चरणमा आफ्नो स्थान सुरक्षित गर्दै खेलप्रेमीहरूलाई स्तब्ध बनाएको छ।

विश्वकपको इतिहासमा सुरुवाती दुवै खेल गुमाएको टोली अघिल्लो चरणमा प्रवेश गर्नुलाई निकै दुर्लभ र जादुमयी पुनरागमनका रूपमा हेरिएको छ। सेनेगलको यो असम्भव प्रायः सफलता फिफाको नयाँ नियम र अन्तिम खेलमा प्रदर्शन गरेको उच्च स्तरको आक्रामक फुटबलका कारण सम्भव भएको हो।

यस पटकको विस्तारित ४८ टोलीको विश्वकप ढाँचा सेनेगलका लागि वरदान साबित भयो। नयाँ नियमानुसार कुल १२ वटा समूहका शीर्ष दुई टोलीहरू सिधै नकआउट चरणमा जाने व्यवस्था छ भने बाँकी ८ स्थानका लागि १२ वटै समूहमा तेस्रो स्थान हासिल गर्ने टोलीहरूको प्रदर्शनलाई एउटै तालिकामा राखेर तुलना गरिन्छ।

सेनेगलले आफ्नो पहिलो खेलमा पूर्व विश्वविजेता फ्रान्ससँग ३-१ र दोस्रो खेलमा युरोपेली प्रतिद्वन्द्वी नर्वेसँग ३–२ को झिनो अन्तरले पराजय भोग्नुपरेको थियो। लगातार दुई हारका कारण शून्य अंकमा खुम्चिएको सेनेगलको गोल अन्तर भने धेरै खस्किएको थिएन, जसले गर्दा उसलाई अन्तिम खेलमा एउटा ठूलो अवसर जीवितै रहेको थियो।

समूह चरणको आफ्नो अन्तिम खेलमा सेनेगलले इराक विरुद्ध मैदान उत्रिँदा केवल जित मात्र नभई विशाल गोल अन्तरको आवश्यकता थियो। सेनेगलका अग्रपंक्तिका खेलाडीहरूले उत्कृष्ट प्रदर्शन गर्दै इराकी रक्षापंक्तिलाई ध्वस्त पारेर ५–० को सानदार जित दर्ता गरे।

यस ऐतिहासिक जितसँगै सेनेगलले ३ खेलबाट कुल ३ अंक मात्र जोड्न सक्यो, तर इराक विरुद्धको ५ गोलको मद्दतले उसको कुल गोल अन्तर +२ पुग्यो। यो गोल अन्तर नै सेनेगललाई अर्को चरणमा पुर्‍याउने मुख्य हतियार बन्यो।

जब फिफाले १२ वटै समूहका तेस्रो स्थानमा रहेका टोलीहरूको अन्तिम सूची तयार गरी तुलना गर्‍यो, तब ३ अंक र +२ गोल अन्तर भएको सेनेगल निकै बलियो स्थितिमा देखियो। अन्य समूहमा तेस्रो भएका ४ अंक जोडेका टोली ८ भन्दा कम थिए । ३ अंक भएको इरानको गोल अन्तर शून्य थियो भने दक्षिण कोरिया र बोस्निया जस्ता टोलीहरूको गोल अन्तर ऋणात्मक (माइनस) रहेको थियो।

२ अंक मात्र जोड्न सकेको उरुग्वे जस्तो बलियो टोली त प्रतियोगिताबाटै बाहिरियो। यसरी, सुरुवाती दुई खेल हारेर पनि दृढ संकल्प र अन्तिम खेलको विशाल जितका कारण सेनेगल उत्कृष्ट तेस्रो टोलीको सूचीमा माथिल्लो स्थानमा रहँदै भाग्यमानी ८ टोलीभित्र पर्न सफल भयो र विश्वकप २०२६ को नकआउट चरणमा आफ्नो स्थान सुरक्षित गर्‍यो।