काठमाडौं । भियतनामको फु क्वोक टापु नजिकै भएको स्पीडबोट दुर्घटनापछि प्रहरीले क्याप्टेन न्गुयेन होङ हाईलाई पक्राउ गरेको छ ।

क्याप्टेनमाथि समुद्री र जलमार्ग सुरक्षा नियमहरू उल्लङ्घन गरेको आरोप लगाइएको छ र उनीविरुद्ध आपराधिक अनुसन्धान सुरु गरिएको छ।

भियतनाम रक्षा मन्त्रालयको आधिकारिक पत्रिका ‘ पिपुल्स आर्मी न्यूजपेपर ‘ ले कप्तानको पक्राउको पुष्टि गरेको छ।

पत्रिकाका अनुसार पक्राउ परेका व्यक्तिको पहिचान क्याप्टेन न्गुयेन होङ हाई (५७) को रूपमा गरिएको छ, जो आन जियाङ प्रान्तको सोन किएन कम्युनको थुआन तिएन गाउँका बासिन्दा हुन्।

यस दुर्घटनामा तमिलनाडुका १० जना सहित जम्मा १५ जना भारतीयको मृत्यु भएको थियो।

भारतीय दूतावासले मृतकहरूमा तमिलनाडुका दश, केरलाका दुई र आन्ध्र प्रदेशका तीन जना रहेको जनाएको छ।