काठमाडौं । सशस्त्र प्रहरी बल (एपीएफ) स्कुल, कीर्तिपुरको भ्रष्टाचार प्रकरणमा मुछिएका अभियुक्तहरूलाई थुनामा राखेर अनुसन्धान गर्न विशेष अदालतले अनुमति दिएको छ। अदालतको इजलासले लेखा अधिकृत कल्पना गुरुङ र एमडी एडभेन्चर टुर्स एण्ड ट्राभल्सका सञ्चालक लीलाबहादुर तामाङलाई थप १० दिन हिरासतमा राख्न अनुमति प्रदान गरेको हो।

विशेष अदालतका न्यायाधीशहरू नारायणप्रसाद पौडेल, हेमन्त रावल र डिल्लीरत्न श्रेष्ठको संयुक्त इजलासले अनुसन्धान प्रक्रियालाई अगाडि बढाउन उक्त म्याद थप गरेको हो। अख्तियार दुरुपयोग अनुसन्धान आयोगले उनीहरूमाथि भ्रष्टाचार निवारण ऐन, २०५९ को दफा ७ र १७ बमोजिम अनुसन्धान गरिरहेको छ।

गत असार २० गते जिल्ला प्रहरी परिसरले दुवै जनालाई नियन्त्रणमा लिएर अनुसन्धान थालेको थियो। त्यसयता अदालतबाट पटक-पटक म्याद थप हुँदै आएकोमा पछिल्लो आदेशसँगै उनीहरूको हिरासत अवधि थपिएको यो पाँचौँ पटक हो।

प्रहरी र सरकारी वकिल कार्यालयको समन्वयमा साउन ८ गते दुवै आरोपीलाई थप अनुसन्धानका लागि अख्तियार दुरुपयोग अनुसन्धान आयोगमा बुझाइएको थियो। हाल अख्तियारले यस घटनासँग सम्बन्धित प्रमाण संकलन तथा विस्तृत अनुसन्धानको कामलाई तिब्रता दिएको छ।