सुदूरपश्चिम। हाल कैलालीको धनगढीलगायत सुदूरपश्चिमका धेरै स्थानमा वर्षा भइरहेको छ।

अत्तरियास्थित जल तथा मौसम विज्ञान कार्यालयका अनुसार आजदेखि दुई-तीन दिनसम्म प्रदेशका अधिकांश स्थानमा हल्कादेखि मध्यम र एक-दुई स्थानमा धेरै भारी वर्षाको सम्भावना छ।

कार्यालय प्रमुख इन्जिनियर सञ्जयकुमार साहका अनुसार प्रदेशका पहाडी क्षेत्रमा साधारणतया बदली रही धेरै स्थानमा मेघगर्जन र चट्याङसहित मध्यम वर्षा तथा एक-दुई स्थानमा धेरै भारी वर्षाको सम्भावना रहेको छ।

यस्तै, तराई क्षेत्रमा साधारणतया बदली रही धेरै स्थानमा मेघगर्जन र चट्याङसहित मध्यम वर्षा तथा एक-दुई स्थानमा भारी वर्षाको सम्भावना छ। हिमाली क्षेत्रमा भने साधारणतया बदली रही धेरै स्थानमा मेघगर्जन र चट्याङसहित मध्यम वर्षाको अनुमान गरिएको छ।

यस अवधिमा लगातार पानी पर्नेभन्दा पनि छिनछिनमा पानी पर्ने र घाम लाग्ने हुनसक्ने अनुमान रहेको साहले जानकारी दिए। “प्रदेशका तराई, पहाड र हिमाली क्षेत्रमा मौसम बदली भइरहने अनुमान छ, तर एक-दुई स्थानबाहेक धेरै भारी वर्षाको सम्भावना कमै छ,” साहले भने, “तथापि नदी तटीय क्षेत्र र डुबान हुने होचा स्थानमा बस्ने नागरिकहरूले विशेष सतर्कता अपनाउन आवश्यक छ।”

आज राति हिमाली तथा पहाडी क्षेत्रमा साधारणतया बदली रही थोरै स्थानमा मेघगर्जन र चट्याङसहित मध्यम वर्षाको सम्भावना छ। तराई क्षेत्रमा भने साधारणतया बदली रही केही स्थानमा मेघगर्जन र चट्याङसहित मध्यम वर्षाको सम्भावना रहेको मौसम कार्यालयले जनाएको छ।

यसैबीच सशस्त्र प्रहरी बल, नेपाल नं ७ वैद्यनाथ बाहिनीले कैलाली र कञ्चनपुरका बाढी प्रभावित क्षेत्र तथा नदी तटीय क्षेत्रमा सतर्कता अपनाउन आग्रह गरेको छ।

पहाडका एक-दुई स्थानमा धेरै भारी वर्षा हुने जानकारी प्राप्त भएकाले सोहीअनुसार सतर्क रहन मातहतका युनिटलाई निर्देशन दिइएको बाहिनीपति सशस्त्र प्रहरी नायब महानिरीक्षक (डिआइजी) दिगविजय सुवेदीले जानकारी दिए।

पहाडी र तराई क्षेत्रमा हुनसक्ने भारी वर्षालाई दृष्टिगत गरी सूचना प्रवाह गर्नुका साथै विपद् व्यवस्थापनका लागि मातहतका युनिटहरूलाई तयारी अवस्थामा राखिएको सुवेदीले बताए।