काठमाडौं।  समस्याग्रस्त सहकारी व्यवस्थापन समितिले समस्याग्रस्त घोषणा गरिएका पाँचवटा सहकारीका साना बचतकर्ताहरूको रकम फिर्ता गरेको छ।

समितिले उपलब्ध गराएको विवरणअनुसार शिवशिखर बहुउद्देश्यीय सहकारीका ५७, कान्तिपुर बहुउद्देश्यीय सहकारीका ५२, ओरिएन्टल को-अपरेटिभका आठ, तुलसी बहुमुखी सहकारीका नौ र आइडियल यमुना सहकारीका नौ जना गरी कुल १३५ जना साना बचतकर्ताको बचत रकम फिर्ता गरिएको हो।

समस्याग्रस्त सहकारी संस्थाहरूबाट उठाइएको ऋण असुली तथा सम्पत्ति व्यवस्थापनबाट प्राप्त रकमबाट पीडित बचतकर्ताहरूलाई रकम फिर्ता गरिएको सरकारले स्पष्ट पारेको छ।

पहिलो चरणमा थोरै रकम जम्मा गरेका साना बचतकर्ताहरूलाई प्राथमिकतामा राखेर रकम फिर्ता गरिएको समितिले जनाएको छ। आगामी दिनमा पनि बचतकर्ताहरूको रकमको परिमाणका आधारमा वर्गीकरण गरी क्रमशः बाँकी रकम फिर्ता गर्दै जाने योजना बनाइएको छ।

प्रचलित कानुनी व्यवस्थाबमोजिम समस्याग्रस्त सहकारीहरूबाट ऋण असुली गर्ने र तिनको सम्पत्ति व्यवस्थापन गरी बचतकर्ताको रकम फर्काउने कार्य निरन्तर रूपमा अघि बढिरहेको समितिले जानकारी दिएको छ।