काठमाडौं । अमेरिकी विमानवाहक युद्धपोत ‘अब्राहम लिङ्कन’ र त्यसको स्ट्राइक ग्रुपका कम्तीमा आठ जना नौसैनिकले आत्महत्याको प्रयास गरेका थिए।

यो तथ्यको पुष्टि अमेरिकी समाचार संस्था सीबीएसले प्राप्त गरेको अमेरिकी नौसेनाका कार्यकारी सचिव हाङ काओको एक पत्रबाट भएको हो।

सीएनएनले सबैभन्दा पहिले यो पत्रबारे समाचार सार्वजनिक गरेको थियो।

उक्त युद्धपोतलाई करिब १० महिनाअघि मध्यपूर्वमा तैनाथ गरिएको थियो र त्यो रेकर्ड समयसम्म तैनाथीमा रहेको थियो।

सीबीएस न्युजले यस विषयमा टिप्पणीका लागि अमेरिकी नौसेनासँग सम्पर्क गरेको छ।

लिङ्कन जहाज र त्यसका चालक दलका करिब ५,००० सदस्यको तैनाथी त्यतिवेला छानबिनको घेरामा आयो, जब गत महिना नौसैनिकका आफन्तहरू र कंग्रेसका धेरै सदस्यहरूले युद्धपोतमा बस्ने अवस्था र त्यहाँका कर्मचारीको मानसिक स्वास्थ्यबारे चिन्ता व्यक्त गरेका थिए।

इरान-अमेरिका तनाव/द्वन्द्व सुरु भएपछि लिङ्कन र त्यसको स्ट्राइक ग्रुपलाई मध्यपूर्वमा तैनाथ गरिएको थियो।

उक्त युद्धपोत अहिले त्यस क्षेत्रबाट बाहिरिइसकेको छ र स्यान डिएगोस्थित आफ्नो अड्डातर्फ फर्किरहेको छ।

विमानवाहक पोतको स्ट्राइक ग्रुपमा विमानवाहक पोतको एयर फोर्स विङ, स्ट्राइक ग्रुप मुख्यालय, विध्वंसक स्क्वाड्रन, एस्कर्ट विध्वंसक र विमानवाहक पोतमा तैनाथ सबै विमानन स्क्वाड्रनहरू समावेश हुन्छन्।

यो पत्र न्युयोर्ककी डेमोक्रेटिक सिनेटर कर्स्टन गिलिब्रान्डले जहाजभित्रको अवस्थाबारे सोधेका प्रश्नहरूको जवाफमा पठाइएको थियो।