सेडेरोट, इजरायल। गाजामा भएको ठूलो विनाशलाई विश्वभरका धेरै मानिसहरूले एउटा भयानक मानवीय त्रासदीका रूपमा हेर्दै आएका छन्।

तर, सन् २०२३ अक्टोबर ७ मा हमास नेतृत्वको घातक आक्रमणबाट सोझै प्रभावित बनेका धेरै इजरायलीहरूका लागि भने गाजा अझै पनि सुरक्षा खतरा, निरन्तरको सन्त्रास र डरको प्रतीकका रूपमा कायम छ।

इजरायलको गाजा सीमा नजिकै रहेको सेडेरोट सहरबाट सीमापारिको बेइत हानुन क्षेत्र प्रस्टसँग देखिन्छ। त्यहाँका धेरैजसो भवनहरू भीषण युद्धका कारण पूर्ण रूपमा ध्वस्त भइसकेका छन्। भग्नावशेषका बीच केही कंकाल बनेका भवनहरू मात्र उभिएका देखिन्छन् भने वरपरको भूगोलमा इजरायली सेनाको बाक्लो गतिविधि निरन्तर जारी छ।

सेडेरोटमा अहिले केही इजरायलीहरू पर्यटकले प्रयोग गर्ने दूरबिन लिएर गाजाको अवस्था अवलोकन गर्न पुग्ने गरेका छन्। उनीहरू डाँडा वा अग्ला स्थानबाट केही समय गाजातर्फ टोलाएर त्यहाँको स्थिति नियाल्छन्।

समाचार एजेन्सी एपीका अनुसार, त्यहाँ पुग्ने केही व्यक्तिहरूले गाजामा भएको व्यापक विनाशप्रति सकारात्मक प्रतिक्रियासमेत व्यक्त गर्ने गरेका छन्।

सन् २०२३ अक्टोबर ७ का दिन हमास नेतृत्वका लडाकुहरूले दक्षिणी इजरायलमा अचानक आक्रमण गर्दा करिब १,२०० जनाको मृत्यु भएको थियो भने २५१ जनालाई नियन्त्रणमा लिएर बन्धक बनाइएको थियो। उक्त अकल्पनीय घटनालगत्तै इजरायल र हमासबीच लामो अनि विनाशकारी युद्ध सुरु भयो। पछि विभिन्न चरणमा युद्धविरामका प्रयासहरू भए पनि स्थिति अझै पूर्ण रूपमा सामान्य र सहज बन्न सकेको छैन।

अक्टोबर ७ को त्यस त्रासदीले इजरायलका सीमावर्ती समुदायहरूमा निकै गहिरो मानसिक असर छाडेको छ। गाजासँग जोडिएका भूभागमा बसोबास गर्ने धेरै मानिसहरूका लागि त्यो दिनको कारुणिक सम्झना आज पनि उनीहरूको दैनिक जीवनको अभिन्न र पीडादायी हिस्सा बनिरहेको छ।

गाजाको सीमासँगै समानान्तर रूपमा फैलिएको राजमार्गका विभिन्न स्थानमा अक्टोबर ७ को हमलामा मारिएका मानिसहरूको सम्झनामा अनेकौँ स्मारकहरू निर्माण गरिएका छन्। हमलाका क्रममा ज्यान बचाउन भाग्ने क्रममा अन्धाधुन्ध गोली लागेका, क्षतविक्षत भएका र गोलीका निशानै-निशान रहेका गाडीहरूलाई पनि स्मारकका रूपमा सुरक्षित राखिएको छ।

त्यसैगरी, त्यस दिन ज्यान गुमाएका महिला सैनिक पर्यवेक्षक (अब्जर्भर) हरूका तस्बिरहरू पनि विभिन्न ठाउँमा सजाएर राखिएका छन्। उनीहरूले सम्भावित हमलाबारे पहिले नै उच्च तहमा चेतावनी दिएका थिए, तर ती चेतावनीहरूलाई समयमै पर्याप्त ध्यान नदिइएको एपीको रिपोर्टमा उल्लेख छ।

अक्टोबर ७ को त्रासले अझै छाडेको छैन

सेडेरोटकी रैथाने बासिन्दा डेगानित बार हेलेले अक्टोबर ७ को घटनाले आफ्नो जीवन र मनोविज्ञानमा पारेको गहिरो प्रभावबारे बताएकी छन्। उनले आफूले अहिले पनि घरमा बार्बेक्यु गर्न नसक्ने उल्लेख गर्दै मासु डढेको वा जलेको गन्ध आउनासाथ आफूलाई सोही विभत्स दिनको यादले सताउने बताइन्।

उनका अनुसार, यस्तो गन्ध नाकमा पर्नेबित्तिकै उनी निकै असहज र भयभीत हुन्छिन्। उनले त्यसलाई ‘नरकको गन्ध’ जस्तै भयावह अनुभव हुने गरेकी छन्।

अक्टोबर ७ को आक्रमणपछि समग्र इजरायलभित्रै सुरक्षा, अस्तित्व र भविष्यलाई लिएर चिन्ता व्यापक रूपमा बढेको छ। विशेष गरी हमलाबाट प्रत्यक्ष प्रभावित बनेका सीमावर्ती क्षेत्रका समुदायहरूमा गाजाप्रतिको डर, आशङ्का र अविश्वास अझ मजबुत बनेर गाडिएको देखिन्छ।

अर्कोतर्फ, गाजाभित्र युद्धका कारण भीषण मानवीय संकट, अकल्पनीय क्षति र व्यापक विनाश भएको छ। यसरी एउटै युद्धलाई लिएर इजरायली र प्यालेस्टिनी दुवै समुदायले आ-आफ्नै ठाउँमा फरक-फरक स्वरूपको पीडा, डर, शोक र त्रासदायी अनुभवहरू बोकिरहेका छन्।

एपीको स्थलगत रिपोर्टले स्पष्ट पारेअनुसार, युद्धविरामका प्रयासहरू भए तापनि अक्टोबर ७ को घटनाले इजरायली सीमावर्ती बासिन्दाहरूको मानसपटलमा छाडेको गहिरो मानसिक चोट अझै निको हुन सकेको छैन।

त्यहाँका धेरै मानिसहरूका लागि गाजा एउटा सामान्य छिमेकी भूगोलभन्दा बढी, जुनसुकै बेला आइपर्न सक्ने सम्भावित खतराको स्रोतका रूपमा स्थापित भइरहेको छ।