काठमाडौं । इजरायलमा सन् २०२३ अक्टोबर ७ मा भएको हमासको साङ्घातिक आक्रमणको तेस्रो वार्षिकीका अवसरमा बुधबार देशभर विभिन्न श्रद्धाञ्जली तथा स्मरण कार्यक्रमहरू आयोजना गरिएका छन्। आक्रमणमा ज्यान गुमाएका मानिसहरूको सम्झनामा यी कार्यक्रमहरू आयोजना गरिएका हुन्।

गत वर्ष गाजामा युद्धविराम सुरु भएपश्चात् पहिलो पटक यस आक्रमणको वार्षिकी मनाइँदै छ। यसैबिच सम्भावित सुरक्षा खतरालाई ध्यानमा राख्दै इजरायलले आफ्ना सैन्य बलहरूलाई उच्च सतर्कतामा राखेको छ।

सन् २०२३ अक्टोबर ७ का दिन हमासको नेतृत्वमा प्यालेस्टिनी लडाकुहरूले गाजाबाट इजरायलको सीमा पार गरेका थिए। बन्दुक, रकेट र ग्रेनेड प्रयोग गरी गरिएका आक्रमणहरूमा १,२२१ जनाको मृत्यु भएको थियो। आधिकारिक इजरायली तथ्याङ्कमा आधारित एएफपीको रिपोर्ट अनुसार, आक्रमणकारीहरूले २५१ जनालाई बन्धक बनाएर गाजा पुर्‍याएका थिए, जसमध्ये ४४ जनाको ज्यान गइसकेको छ।

आक्रमणको ठीक तीन वर्षपछि बुधबार बिहान ६:२९ बजे किबुत्ज कफर अजामा विशेष श्रद्धाञ्जली कार्यक्रम राखिएको छ। सन् २०२३ अक्टोबर ७ मा यही समयमा आक्रमण सुरु भएको थियो। गाजा सीमा नजिकै रहेको यस किबुत्जमा हमासको आक्रमणका क्रममा ६४ जनाको मृत्यु भएको थियो भने १८ जनालाई बन्धक बनाएर लगिएको थियो।

दक्षिणी इजरायलस्थित नोभा म्युजिक फेस्टिभल भएको स्थानमा पनि स्मरण कार्यक्रम आयोजना गरिनेछ। यहाँ आक्रमणका क्रममा ३७० भन्दा बढी मानिसको मृत्यु भएको थियो भने दर्जनौँलाई बन्धक बनाइएको थियो। यसबाहेक मृतकका परिवारजनहरू बुधबार साँझ तेल अभिभको एक पार्कमा भेला हुने कार्यक्रम छ।

यी कार्यक्रमहरूका बिच इजरायलमा सुरक्षा व्यवस्था कडा पारिएको छ। आगामी आम निर्वाचनका लागि अब करिब तीन हप्ताको समय बाँकी रहेको छ र अक्टोबर ७ को आक्रमण चुनावी बहसमा मुख्य मुद्दा बनेको छ।

इजरायलका रक्षा मन्त्रीले मङ्गलबार गाजामा रहेका इजरायली सैनिकहरूलाई निशाना बनाउन हमासले प्रयास गरिरहेको गुप्तचर जानकारी प्राप्त भएको बताएका छन्। सो जानकारीपछि सेनालाई उच्च सतर्कतामा राखिएको छ।

प्रधानमन्त्री बेन्जामिन नेतान्याहूले सोमबार गाजामा हमासको शासन अब नरहने दोहोर्‍याएका छन्। उनले अक्टोबर ७ को आक्रमणमा संलग्न व्यक्तिहरू र बन्धक बनाउनेहरूलाई कारबाहीको दायरामा ल्याउने प्रतिबद्धता पुनः व्यक्त गरेका छन्।

अक्टोबर ७ को आक्रमणको जवाफमा इजरायलले गाजामा व्यापक सैन्य अभियान सुरु गरेको थियो। गाजाको स्वास्थ्य मन्त्रालयका अनुसार हालसम्म ७४,२०० भन्दा बढी मानिसको मृत्यु भइसकेको छ। संयुक्त राष्ट्रसङ्घले पनि यी तथ्याङ्कहरूलाई आधिकारिक र विश्वसनीय मान्दै आएको छ।

तीन वर्षको अवधिमा इजरायलले लेबनानको हिजबुल्लाह र इरानसहित धेरै मोर्चामा सैन्य कारबाही चलाएको छ। गाजामा युद्धविराम भए तापनि स्थिति अझै अत्यन्तै कष्टकर छ र लाखौँ मानिसहरू अझै पनि पाल तथा अस्थायी टहरोमा बस्न बाध्य छन्। इजरायलले गाजाको ६० प्रतिशतभन्दा बढी भूभागमा आफ्नो नियन्त्रण रहेको र हमाससँग जोडिएका सुरक्षा खतराहरूविरुद्ध आफ्नो कारबाही जारी रहने जनाएको छ।