काठमाडौं। नेपाली कांग्रेसको १५औं महाधिवेशनमा महामन्त्री पदका उम्मेदवार बनेका डा. सुनिलकुमार शर्माले चुनावी परिणाम आफ्नो पक्षमा नआए पनि पार्टी र जनताको सेवा गर्ने आफ्नो पवित्र भावना कहिल्यै नमर्ने भावुक प्रतिक्रिया दिएका छन्।

सामाजिक सञ्जालमार्फत आफ्ना भावना व्यक्त गर्दै उनले महाधिवेशनबाट निर्वाचित सम्पूर्ण पदाधिकारीहरूलाई कार्यकालको शुभकामना तथा बधाई दिएका छन्।

साथै, आफूप्रति विश्वास गरेर अमूल्य मत दिने महाधिवेशन प्रतिनिधिहरू र कठिन चुनावी अभियानमा हरदम साथ र माया दिने सम्पूर्ण शुभचिन्तकहरूप्रति उनले गहिरो कृतज्ञता प्रकट गरेका छन्।

निर्वाचनको मतपरिणामले आफूलाई पराजित गराए पनि पार्टीको रूपान्तरण गर्ने आफ्नो अटल सङ्कल्पलाई भने कुनै असर नपारेको उनले प्रष्ट पारेका छन्। आफ्नो भावना व्यक्त गर्दै उनले भनेका छन्, “पदमा रहेर वा नरहेर, पार्टी र देशका दूरदराजमा बसोबास गर्ने आम नागरिकको सेवामा समर्पित थिएँ र रहनेछु।”

नेपाली कांग्रेसलाई थप जनमुखी, सेवामुखी, आधुनिक र परिणाममुखी पार्टीका रूपमा उभ्याउने आफ्ना सपना र प्रतिबद्धताहरू अझै जीवित रहेको उल्लेख गर्दै उनले पार्टीभित्र सकारात्मक परिवर्तन, बलियो सङ्गठन र जनउत्तरदायी राजनीतिक संस्कार बसाउन आफू सधैँ लागिपर्ने बताएका छन्।

लोकतन्त्रको सुन्दर पक्ष नै प्रतिस्पर्धा भएको उल्लेख गर्दै उनले सबै नेता, कार्यकर्ता र नवनिर्वाचित पदाधिकारीहरूसँग हातेमालो गरेर पार्टी र जनताको हितमा काम गर्ने दृढ अठोट व्यक्त गरेका छन्।