काठमाडौं । उत्तर कोरियाले आफ्नो नौसेनाको मिसन क्षमता र युद्ध प्रतिरोधात्मक क्षमताको परीक्षण गर्न बुधबार दुई प्रकारका पनडुब्बी-प्रक्षेपित रणनीतिक क्रुज मिसाइलको सफलतापूर्वक परीक्षण प्रहार गरेको छ। उत्तर कोरियाली राज्य नियन्त्रित समाचार एजेन्सी ‘केसीएनए’ ले बिहीबार यस परीक्षणबारे जानकारी दिएको हो।

सर्वोच्च नेता किम जोङ उन को शीर्ष सैन्य प्राथमिकतामध्ये एक मानिएको ‘समुद्रमा आधारित परमाणु प्रतिरोधात्मक क्षमता’ स्थापना गर्ने उद्देश्यका साथ उत्तर कोरियाले आधुनिक पनडुब्बी, ब्यालिस्टिक र क्रुज मिसाइलहरूको विकासलाई तीव्र पारेको छ।

उत्तर कोरियाको पूर्वी तट नजिकै समुद्रमा वरिष्ठ सैन्य अधिकारीहरूको उपस्थितिमा यी मिसाइलहरू परीक्षण गरिएको थियो। केसीएनएका अनुसार यस परीक्षणले छिमेकी राष्ट्रहरूको सुरक्षामा कुनै प्रतिकूल असर पारेको छैन।

दक्षिण कोरियाको ‘जोइन्ट चिफ्स अफ स्टाफ’ ले प्रक्षेपण अघिदेखि नै अनुगमन गरिरहेको जनाउँदै एउटा क्रुज मिसाइल भर्टिकल लन्च सिस्टमबाट र अर्को टर्पिडो ट्युबबाट प्रहार गरिएको मूल्याङ्कन गरेको छ।

सार्वजनिक गरिएका तस्बिरहरूका आधारमा दक्षिण कोरियाली रक्षा विश्लेषकहरूले यो परीक्षण उत्तर कोरियाले सेप्टेम्बर २०२३ मा सार्वजनिक गरेको डिजेल-सञ्चालित ‘किम कुन ओक हिरो’ नामक परिमार्जित पनडुब्बीबाट गरिएको निष्कर्ष निकालेका छन्।

भर्टिकल लन्च सिस्टमले टर्पिडो ट्युबको तुलनामा पनडुब्बीलाई धेरै मिसाइलहरू द्रुत गतिमा प्रहार गर्न सक्षम बनाउँछ, जसले विरोधी पक्षको पूर्व चेतावनी समय घटाउँदै रक्षा प्रणालीलाई जटिल बनाइदिन्छ।

‘कोरिया इन्स्टिच्युट फर नेसनल युनिफिकेसन’का वरिष्ठ अनुसन्धानकर्ता होङ मिनका अनुसार उत्तर कोरियाले यसलाई ‘परीक्षण’ नभई ‘नियमित परिचालन-तयारी निरीक्षण’ भनेकाले यो पनडुब्बी पूर्ण सैन्य तैनातीतर्फ अघि बढिरहेको सङ्केत गर्दछ।

रक्षा विश्लेषकहरूका अनुसार उत्तर कोरियाले छिट्टै नै पनडुब्बीबाट प्रहार गरिने ब्यालिस्टिक मिसाइलको पनि परीक्षण गर्ने प्रबल सम्भावना रहेको छ।