काठमाडौं।  अविरल वर्षा र पहिरोलगायतका प्राकृतिक विपद्का कारण गण्डकी प्रदेशअन्तर्गत म्याग्दी र गोरखा जिल्लाका प्रमुख सडक खण्डहरू प्रभावित भएका छन्।

नेपाल प्रहरीले सार्वजनिक गरेको पछिल्लो विवरण अनुसार आज बिहान ६ बजेसम्म दुवै जिल्लाका मुख्य सडक मार्गहरूमा यातायात सञ्चालनमा सास्ती र अवरोध कायम रहेको छ।

म्याग्दी जिल्लाको रघुगंगा गाउँपालिका-२ स्थित बैसरीमा बेनी-जोमसोम सडक खण्डमा पहिरो खसेका कारण यातायात सेवा प्रभावित बनेको छ। गत असोज १० गते बिहान ५:५० बजेदेखि पहिरोले अवरुद्ध भएको उक्त सडक खण्ड हालसम्म पनि पूर्ण रूपमा सञ्चालनमा आउन सकेको छैन। हाल उक्त स्थानमा एकतर्फी रूपमा मात्र सवारी साधन सञ्चालन भइरहेका छन्।

यता गोरखा जिल्लामा भने बाढीका कारण सडक आवागमन पूर्ण रूपमा ठप्प बनेको छ। गत असोज २५ गते बिहान ५:३० बजे आएको बाढीले आरुघाट गाउँपालिका–२, ३ र वडा नम्बर ९ स्थित नयाँपुल सोतिमा रहेको फलामे पुलका साथै गोरखा आरुघाटबाट धादिङ जोड्ने सडक खण्ड पूर्ण रूपमा अवरुद्ध पारेको छ। सडक र पुलमा क्षति पुगेपछि उक्त क्षेत्रमा यातायात सेवा पूर्ण रूपमा रोकिएको प्रहरीले जनाएको छ।