काठमाडाैं। क्यानडाको अल्बर्टा प्रान्तस्थित एक सैन्य आधार शिविरमा भएको भीषण आगलागीमा परी क्यानडाली सेनाका चार जनाको मृत्यु भएको छ भने दर्जनौँ घाइते भएका छन्।

आइतबार ओटावाबाट देशका नाममा सम्बोधन गर्दै प्रधानमन्त्री मार्क कार्नीले यस घटनालाई “शान्तिकालमा क्यानडाली भूमिमा सैन्य बलले भोग्नुपरेको सबैभन्दा ठूलो त्रासदीमध्ये एक” भनी वर्णन गरेका छन्।

देशको सबैभन्दा व्यस्त सैन्य तालिम केन्द्रहरूमध्ये एक ‘क्यानडियन फोर्सेस बेस वेनराइट’ मा शनिबार स्थानीय समय अनुसार दिउँसो करिब १६:०० बजे (२२:०० जिएमटी) आगलागी सुरु भएको थियो, जसलाई अहिले नियन्त्रणमा लिइसकिएको छ। आगलागीको कारण अझै स्पष्ट हुन सकेको छैन, तर अधिकारीहरूले यसको सम्बन्ध कुनै “आतङ्कवादी गतिविधि” सँग नरहेको बताएका छन्।

“हामीले गुमाएका हाम्रा सशस्त्र बलका ती साहसी सदस्यहरूप्रति सिङ्गो देश शोकमा छ,” प्रधानमन्त्री कार्नीले भने।

मृत्यु हुनेहरूमा सर्जेन्ट मोर्गन वोङ, प्राइभेट सोन फारेल, प्राइभेट एडन गुल्डिङ र प्राइभेट हेडेन लिक्केमार्क रहेको पुष्टि भएको छ।

अस्पतालमा उपचाररत ३९ जना घाइतेमध्ये कम्तीमा १९ जनाको अवस्था गम्भीर रहेको अल्बर्टाकी प्रिमियर डेनियल स्मिथले आइतबार साँझ आयोजित पत्रकार सम्मेलनमा जानकारी दिएकी छन्।

पुनः आगो सल्कन नदिन दमकल र उद्धार टोलीहरू घटनास्थलमै खटिएका वेनराइटका मेयर ब्रुस प्युले बताए।

मेजर जनरल वेड रुटल्याण्डका अनुसार पैदल सेनाका सदस्यहरूले ग्रेनेड रेन्ज र अट्याक रेन्जमा “लाइभ हतियारसहित उच्च तीव्रताको लडाइँ तालिम” गरिरहेका थिए, जहाँ १० जना सैनिकहरूले काल्पनिक शत्रुमाथि आक्रमण गर्ने अभ्यास गर्छन्।

उनले तालिम क्षेत्रमा ग्रेनेड लन्चर, ग्रेनेड, साना हातहतियार र गोलाबारुदसहित ठूलो मात्रामा हतियार प्रयोग भइरहेको बताए। तालिम क्षेत्रबाट करिब १ किलोमिटर (०.६ माइल) टाढा घाँसमा सल्केको आगो द्रुत गतिमा अट्याक रेन्जतर्फ बढेको थियो।

“तालिम क्षेत्रभरि एकैसाथ धेरै तालिम गतिविधिहरू भइरहेका थिए,” उनले भने, “अस्वाभाविक रूपमा चलेको तीव्र हावाले गर्दा आगो द्रुत गतिमा फैलियो र रेन्जको प्रशासनिक क्षेत्रतर्फ मोडियो।”

शनिबार आगो लाग्नुअघि बेसबाट तोप चलेको आवाज सुनिएको र पछि अचानक रोकिएको मेयर प्युले बताए। घटनाको लगत्तै स्थानीय आपतकालीन सेवाहरूलाई पूर्ण सतर्कताका साथ परिचालन गरिएको थियो।

प्रधानमन्त्री कार्नीका अनुसार सैन्य तथा आपत्कालीन उद्धार टोलीहरूले रातभर “अत्यन्तै कठिन परिस्थिति” मा आगोसँग जुधेका थिए। घाइते हुनेहरूमा रिजर्भिस्ट (अतिरिक्त सैनिक) र प्रिन्सेस प्याट्रिसियाज क्यानडियन लाइट इन्फ्यान्ट्रीका सैनिकहरू रहेका छन्।

क्यानडियन आर्म्ड फोर्सेसले जारी गरेको विज्ञप्तिमा घटनाको अनुसन्धान भइरहे पनि यो कुनै आतङ्कवादी ग्याङ वा बाह्य हस्तक्षेपका कारण भएको सङ्केत नपाइएको उल्लेख छ।

अल्बर्टाको राजधानी एडमोन्टनबाट करिब २१० किलोमिटर पूर्वमा रहेको वेनराइट क्यानडाली सेनाले लाइभ-फायर तालिमका लागि प्रयोग गर्ने मुख्य बेसहरूमध्ये एक हो। यहाँ क्यानडा र मित्रराष्ट्रका सैनिकहरू रहने गर्छन्। सामान्य दिनमा यहाँ करिब ६९० सैन्य कर्मचारी र ३०० नागरिक कर्मचारी कार्यरत हुन्छन्।

रोयल अलेक्जान्ड्रा अस्पतालका आपतकालीन विभागका डाक्टर वारेन थिर्स्कका अनुसार घाइतेहरूको सङ्ख्या अत्यधिक भएकाले वेनराइटका स्वास्थ्य सुविधाहरू पूर्ण रूपमा प्रभावित भएका थिए।

प्रादेशिक स्वास्थ्य एजेन्सीले वेनराइटमा २२ वटा एम्बुलेन्स र ८ वटा एयर एम्बुलेन्ससहित ३० वटा उद्धार युनिटहरू परिचालन गरिएको जनाएको छ।

स्थानीय प्रत्यक्षदर्शीहरूका अनुसार रातभर एम्बुलेन्सहरू आउने जाने गरिरहेका थिए र अस्पतालको दृश्य कुनै “युद्धको चलचित्र” जस्तै भयावह देखिन्थ्यो।