काठमाडौँ। लगातारको पहिरो र बाढीका कारण गण्डकी तथा कर्णाली प्रदेशका तीन प्रमुख सडकखण्ड प्रभावित भएका छन्।

नेपाल प्रहरीका अनुसार म्याग्दी र सुर्खेतमा सडक एकतर्फी रूपमा सञ्चालन भइरहेको भए पनि गोरखामा भने सवारी आवागमन पूर्ण रूपमा बन्द भएको छ।

प्रहरीले दिएको जानकारीअनुसार म्याग्दीको रघुगंगा गाउँपालिका-२ स्थित बैसरीमा पहिरो खसेपछि बेनी-जोमसोम सडकखण्ड असोज १० गते बिहान ५:५० बजेदेखि एकतर्फी मात्र सञ्चालनमा आएको छ।

यस्तै, गोरखाको आरुघाट गाउँपालिका-२ र ३ तथा आसपासका क्षेत्रमा आएको बाढीका कारण सडक सञ्चालनमा समस्या आएको छ। सोतिस्थित फलामे पुलमा क्षति पुगेपछि आरुघाटबाट धादिङ जोड्ने मुख्य सडकखण्ड असोज २५ गते बिहान ५:३० बजेदेखि पूर्ण रूपमा ठप्प बनेको प्रहरीले जनाएको छ।

यसैगरी, कर्णाली राजमार्गअन्तर्गत सुर्खेतको बराहताल गाउँपालिका-७ औलिसेमा पहिरो खस्दा कात्तिक १ गते बिहान ५:४५ बजेदेखि सडक एकतर्फी रूपमा मात्र सञ्चालन भइरहेको छ।

विपद्का कारण विभिन्न सडकखण्डमा आवागमन प्रभावित भएकाले ती क्षेत्रमा यात्रा गर्दा विशेष सतर्कता अपनाउन नेपाल प्रहरीले सर्वसाधारणसँग आग्रह गरेको छ।