काठमाडौं । होर्मुज जलडमरूमध्य (होर्मुज स्ट्रेट) मा तेल तस्करीको आरोपलाई लिएर इरानले कडा अडान लिएको छ। इरानको रिभोलुसनरी गार्ड्स (आइआरजिसी) नजिकको एक स्रोतका अनुसार, सामुद्रिक नियमहरूको उल्लङ्घन गर्ने पानीजहाजहरूले आफ्नो आवागमन रोकेका छन्। प्रेस टिभीको रिपोर्टअनुसार, पानीजहाजहरूलाई सहयोग पुर्‍याउने नेभिगेसन प्रणालीहरू नष्ट गरिएपछि र तेल ट्याङ्करहरूमाथि आक्रमण भएपछि यो कदम चालिएको हो।

प्रेस टिभीका अनुसार, बिहीबार राति अर्को एक ट्याङ्कर नष्ट गरिएपछि नियम उल्लङ्घन गर्ने जहाजहरूको आवतजावत पूर्ण रूपमा ठप्प भएको स्रोतले जनाएको छ। यसअघि पनि तीन वटा तेल ट्याङ्करहरूमाथि आक्रमण गरिसकिएको थियो। इरानको फारस न्युज एजेन्सीले पनि आइआरजिसी नौसेनानिकट एक अज्ञात अधिकारीलाई उद्धृत गर्दै होर्मुज स्ट्रेट भई गुज्रिने त्यस्ता जहाजहरूको बाटो रोकिएको जानकारी दिएको छ।

आइआरजिसी नौसेनाले बिहीबार जारी गरेको एक वक्तव्यमा चार वटा जहाजहरूलाई निसाना बनाइएको जनाएको थियो। इरानका अनुसार, यी जहाजहरू उत्तरी पारसको खाडीमा तेलको ओसारपसार गरिरहेका थिए र होर्मुज स्ट्रेटमा तोकिएको नियमविपरीत बाटोको प्रयोग गरिरहेका थिए।

अमेरिकाले जहाजहरूलाई प्रतिबन्धित सामुद्रिक मार्गबाट जानका लागि प्रोत्साहन गरिरहेको आरोप आइआरजिसीले लगाएको छ। इरानको दाबीअनुसार, उक्त मार्गमा बारुदी सुरुङहरू (माइन्स) बिछ्याइएको छ र सोही बाटोबाट जहाजहरू लैजाने प्रयास गरिएका कारण सामुद्रिक दुर्घटनाहरू बढिरहेका छन्।

आइआरजिसीनिकट स्रोतले चेतावनी दिँदै यदि पुनः तेलको तस्करी सुरु भएमा पानीजहाज र तिनलाई सहयोग गर्ने प्राविधिक प्रणालीहरूलाई निसाना बनाएर पहिलेभन्दा अझ कडा कारबाही गरिने बताएको छ। यद्यपि, यी दाबीहरूबारे अमेरिकाको प्रतिक्रिया भने प्राप्त हुन सकेको छैन।