दोहा । कतारमा कोरोना भाइरस  (कोभिड–१९) को संक्तमण बढ्दै गएपछि यसको नियन्त्रण तथा रोकथाम गर्न यहाँको सरकारले विभिन्न प्रयासहरु गरिरहेको छ ।

यसैबीचमा आउँदो आइतबारदेखि कतारमा सबैले अनिवार्य रुपमा मास्कको प्रयोग गर्नुपर्ने भएको छ । सेवा प्रदायक क्षेत्रमा काम गर्ने र निमार्ण क्षेत्रमा काम गर्ने श्रमिकहरुले अनिवार्य रुपमा मास्कको प्रयोग गर्नु पर्ने नियम लगाइएको सरकारी समचार संस्था क्युन न्युज एजेन्सीले जनाएको छ ।

बुधबार बसेको क्याबिनेट मिटिङले यस्तो निणर्य गरेको हो । नयाँ नियम अनुसार मार्केटमा समान खरिद गर्न जाने ग्राहकले पनि अनिवार्य रुपमा मास्कको प्रयोग गर्नुपर्नेछ । मास्क नलगाउने ग्राहकले मार्केटहरुमा प्रवेश पाउने छैनन् ।

कोरोना संक्रमण फैलन नदिन भन्दै लगाइएको यो नियम कतारका सरकारी तथा नीजि क्षेत्रका सेवा प्रदायक र निर्माण क्षेत्रका कामदारले अनिवार्य रुपमा पालना गर्नुपर्नेछ ।नियमको अनुगमन कडा रुपमा गरिने बताइएको ।

सरकारको निर्देशन उलंघन गर्ने व्यक्तिलाई १९९० को कानुनको धारा १७ बमोजिम २ लाख कतारी रियाल (नेपाली करिव ६७ लाख ५८ हजार) जरिवाना तथा ३ वर्षभन्दा बढि जेल सजाय वा यी दुइ मध्ये एक सजाय गरिने मन्त्रालयले जनाएको छ ।

The Cabinet decided that workers in contracting sector are obligated to wear masks while carrying out their duties and tasks, and officials in this sector should provide these masks and adhere to the established precautionary measures. #QNA

— Qatar News Agency (@QNAEnglish) April 22, 2020

कतारमा हालसम्म ७ हजार ७ सय ६४ जनामा कोरोना भाइरसको संक्रमण देखिएको छ । संक्रमितमध्ये ७ सय ५० जना उपचारपछि निको भएका छन भने १० जनाको ज्यान गएको छ । कतारमा झण्डै ४ लाखको हाराहारीमा नेपाली रहेका छन । संक्रमितहरुको राष्ट्रियता बारे नखुलाइए पनि त्यहाँ केही नेपालीहरूमा पनि कोरोनाको संक्रमण देखिएको छ ।

यसअघि नेपाल पत्रकार महासंघ कतार शाखाका अध्यक्ष करिम बक्श मियाले आफू कोरोनाबाट संक्रमित भएर उपचार गराइराखेको फेसबुक मार्फत जानकारी गराएका थिए ।