काठमाडौं। युईएफए युरोकप फुटबलको समूहचरणको अन्तिम खेलमा स्विट्जरल्यान्डले टर्कीलाई पराजित गरेको छ।

आइतबार बाकुमा सम्पन्न खेलमा स्विजरल्याण्डले टर्कीलाई ३ – १ गोलअन्तरले पराजित गरेको हो।

स्वीजरल्याण्डका लागि जद्रान साकिरीले दुई र हरिस सेभ्रोभिकले एक गोल गरे। टर्कीका इरफान केभाचीले एक गोल फर्काए ।

खेलको छैटौँ मिनेटमा नै हरिस सेभ्रोभिकले गोल गर्दै स्विजरल्याण्डलाई १ – ० को अग्रता दिलाएका थिए।  खेलको २६ औं मिनेटमा सकिरीले उत्कृष्ट गोल गर्दै स्विजरल्याण्डलाई गर्दै २ – ० को अग्रता दिलाए।

टर्कीका इरफान केभाचीले ६२ औं मिनेटमा गोल गर्दै टर्कीलाई खेलमा फर्काउने प्रयास गरेका थिए।

तर, दोस्रो हाफको ६८ औं मिनेटमा साकिरीले व्यक्तिगत दोस्रो गोल गर्दै स्विजरल्याण्डलाई ३ – १ गोलको जित दिलाए।

स्विजरल्याण्डले आजको खेलमा जित हासिल गरे पनि अन्तिम १६ को यात्रा भने तय गर्न सकेन। अन्तिम १६ मा ६ वटा समूहबाट १२ टिम र प्रत्येक समूहमा तेस्रो नम्बरमा रहने मध्येबाट उत्कृष्ट ४ टिमले नकआउटको यात्रा तय गर्ने भएकोले स्विजरल्याण्डको झिनो आसा भने बाँकी नै छ।

स्विट्जरल्यान्ड जित निकाल्दै समूह ए मा ४ अंक जोडेको छ। समान ४ अंक जोडेको वेल्स गोलअन्तरका आधारमा नकआउट चरणमा पुगेको छ।
स्विट्जरल्यान्ड ३ खेलमा ४ अंककासाथ तेस्रो नम्बरमा छ।

समूहको पुछारमा रहेको टर्की भने अंकबिहीन हुँदै प्रतियोगिताबाट बाहिरीएको छ।