काठमाडौं । १० वर्षको बेलायतको अनुभवलाई उपयोग गर्दै जनप्रकाश चापागाईले चेन होटल सञ्चालनमा ल्याएका छन् । दियालो र अनुपम फुडल्याण्डको नाममा उनको समूहको होटल बिस्तार भइरहेको छ ।
१५ वर्षअघि काठमाडौँको बसुन्धरामा उनको नेतृत्वको समूहको पहिलो होटल दियालो फुडल्याण्ड सुरु भएको हो । सोही नाममा बुटबल, भरतपुर र बालाजुमा पनि सञ्चालनमा रहेको छ ।

त्यसैगरी अनुपम फुडल्याण्ड काठमाडौँको बत्तीसपुतलीमा सञ्चालनमा छ । अनुपमलाई पोखरा, हेटौँडा र नुवाकोटमा शाखा बिस्तार गर्ने उनको तयारी छ ।

चापागाईंले भने, ‘आउँदो पाँच वर्षमा २० स्थानमा शाखा खोल्ने तयारीमा छौं ।’ भरतपुर महानगरपालिका–५ स्थायी घर भएका उनले त्यहाँको बालकुमारी कलेजबाट कानूनमा प्रविणता प्रमाणपत्र तह उत्तीर्ण गरेर बेलायत पुगेका हुन् ।

नौ वर्ष आठ महिनाको लण्डन बसाइँमा उनको जिम्मेवारी राम्रो होटलको सेफको थियो । त्यहाँको आफ्नो अनुभवलाई स्वदेशमा नै प्रयोग गर्नुपर्छ भन्ने लागेपछि स्वदेश फर्किएर काम थालेको चापागाईले बताए । उनले भने, ‘मैले त्यहाँ पैसा र सीप पाएपछि स्वदेशमा नै गएर काम गर्ने रहर भयो ।’

नेपाल फर्किएसँगै काठमाडौँमा एक जना साझेदार(माधव पाण्डे) सँग मिलेर उनले दियालो फुडल्याण्ड सुरु गरे । यससँगै साझेदारको संख्या थप गरेर व्यवसाय बिस्तार हुन थाल्यो ।

सुरुमा दुई जनाले दुई करोड २० लाख लगानीबाट थालिएको व्यापार आजसम्म आईपुग्दा ५० करोडभन्दा माथिको भएको छ र साझेदार २७ जना पुगेका छन् । मुख्य समूहमा चापागाईसहित पाँच जना छन् भने शाखामा स्थानीय साझेदार ३० प्रतिशत राख्ने गरिएको छ । सबैलाई जोड्दा यो सङ्ख्या पुगेको हो ।

आम्दानीको २० प्रतिशत व्यवसाय बिस्तारका लागि खर्च गरिँदै आएको उनले बताए । राजधानीमा ठूला कार्यक्रमका लागि चापागाई परिचित नाम हो । राजनीतिक दलका सभासम्मेलन गर्नु पर्दा आउने नाममध्येमा उनलाई पहिलो लहरमा लिने गरिन्छ ।

आफ्नो गृह जिल्ला चितवनमा उनले सबैभन्दा ठूलो सभाहलसहितको दियालो फुडल्याण्ड सञ्चालनमा ल्याएका छन् । उनले भने, ‘हाम्रो हलमा २ हजार २ सय कुर्सी अट्छ । राजधानी बाहिर यति ठूलो हल कसैको छैन ।’

कला कौशलले सजिएको बेलायती शैलीको आकर्षक हलसँगै २० कोठा दियालोमा छ । उनको दाबी छ सबैकोभन्दा मीठो खाना हामी खुवाउन सक्छौँ । आफैँ सेफ भएकाले उनको होटलमा परिकारमा बढी जोड दिइन्छ ।

दियालो समूहका अध्यक्ष चापागाई काठमाडौँका जस्ता सेफ स्थानीयस्तरमा पाउन कठिन र एकै खालका खानाका लागि राजधानीका सेफ राखेर बाहिरी शाखा सञ्चालनमा आएको बताए । चितवनमा राष्ट्रियस्तरका कार्यक्रम गर्न सहयोग पुगोस् भन्नका लागि ठूलो हलमा खर्च गरेको उनको भनाइ छ ।

चितवनको शाखामा मात्र १२ करोड रुपैयाँ खर्च भएको चापागाईले बताए । होटल व्यवसायी महासंघका वरिष्ठ उपाध्यक्ष दिनेश चुकेले विदेशको सीप उपयोग हुने गरी स्वदेशमा व्यवसाय बिस्तार गर्नु सकारात्मक भएको बताए ।

अहिलेको परिस्थिति सकारात्मक नभए पनि आउँदा दिनमा होटल व्यवसाय राम्रो हुने उनको भनाई छ । चितवन देशकै केन्द्रबिन्दु भए पनि ठूला हलको अभावमा कार्यक्रम हुन नसकेको भन्दै उनले चापागाई समूहको होटल ठूला कार्यक्रमका लागि प्रभावकारी हुने बताए ।

दियालो फुडल्याण्ड चितवनका साझेदार सनदकुमार पियाले विदेशमा आर्जन गरेको सीप चितवन ल्याएर यसको प्रतिफल नेपालीलाई दिने उदाहरणीय काम चापागाईले गरेको बताए । नेतृत्वकर्तासँग सीप भएकाले आफूहरु लगानी गर्दा ढुक्क रहेको उनको भनाइ छ । रासस