सिड्नी। सार्कको आक्रमणमा एक बेलायती पौडीबाजको मृत्युपछि बन्द गरिएका सिड्नीका समुद्री तटहरु खुलेका छन्। पौडी खेल्न गएका एक बेलायतीको सार्कको आक्रमणमा मृत्यु भएपछि सिड्नीका समुद्री तट बन्द गरिएको थियो । सार्कको आक्रमणमा ५९ वर्षपछि पहिलो पटक बुधबार एक जनाको मृत्यु भएको थियो।

पूर्वी सिड्नीको समुद्री तटमा पौडी खेल्ने क्रममा बेलायतका ३५ वर्षीय सिमोन नेलिस्टको मृत्यु भएको थियो। समुद्री तट खुला गरिए पनि आइतबारका लागि तोकिएको एउटा लोकप्रिय परोपकारी पौडी रद्द गरिएको छ।

३ मिटर लामो सो नरभक्षी सार्क मार्न राज्यका अधिकारीहरुले खोजी कार्य तीव्र पारेका छन्। सार्क फेला पार्न जेट स्कीमा सर्फ लाइफसेभरहरूले शहरको पूर्वमा बोन्डीदेखि दक्षिणमा क्रोनुल्लासम्म गस्ती गरेका थिए।

सार्कलाई चारा दिन प्रयोग गरिने ड्रम लाइनहरू तटीय क्षेत्रमा राखिएको विवरण पनि सार्वजनिक भएका छन्। सार्कका गतिविधिहरु पत्ता लगाउन हेलिकोप्टर र ड्रोन परिचालन गरिएका छन्।

आक्रमणपछि बिहीबार समुद्री तटमा पौडीबाजलाई जान रोक लगाइएको थियो।