काठमाडौं। पाकिस्तानी प्रधानमन्त्री इमरान खानले पूरै देशसँग आइतबार इस्लामाबादमा हुने सभामा अपिल हुन र देशलाई आफू किनबेचको विरुद्धमा रहेको सन्देश दिन अपिल गरेका छन् । बिहीबार एक भिडियो सन्देश जारी गर्दै इमरान खानले एक खास समूहले विगत ३० वर्षदेखि यो देशलाई लुटिरहेको र अहिले त्यो समूहले त्यसरी लुटेको पैसाको प्रयोग जनप्रतिनिधिहरुको विवेक किन्नको लागि गरिरहेको आरोप लगाए ।

इमरान खानले कुरानको समेत हवाला दिँदै कुरानमा अल्लाहको आदेश पनि सत्यको साथमा उभिनुपर्ने र खराबीको विरुद्ध उभिनुपर्ने भएको बताए । उनले जनतासँग अपिल गर्दै देशका सांसदहरुको विवेक किन्न खोजेकाहरुलाई आफू यसको विरुद्धमा भएको र कुनै किनबेचले देशको लोकतन्त्रलाई नोक्सानी गर्न नसक्ने स्पष्ट सन्देश दिनुपर्ने बताए । बुधबार पनि इमरान खानले विपक्षीको अविश्वासको प्रस्ताव विफल हुने बताइसकेका छन् । उनले सेनासँग आफ्नो राम्रो सम्बन्ध भएको र आफूले राजीनामा नदिने पनि स्पष्ट पारेका छन् ।

27 مارچ کو پوری قوم میرے ساتھ نکلے اور بتائے کہ ہم بدی کے خلاف ہیں۔ ڈاکوؤں کے ٹولے نے ملک کا پیسہ چوری کیا اور اب اراکین پارلیمنٹ کے ضمیر کی قیمتیں لگائی جارہی ہیں۔ وزیراعظم عمران خان pic.twitter.com/0DE38w4YSU

— PTI (@PTIofficial) March 24, 2022

पाकिस्तानका विपक्षी पार्टीहरुले ८ मार्चमा अविश्वासको प्रस्ताव पेश गरेका थिए । उनहिरुले प्रधानमन्त्री इमरान खानमाथि कुप्रबन्धन र अर्थव्यवस्था खराब बनाएको आरोप लगाएका थिए । पाकिस्तानको नेशनल असेम्बलीको बैठक भोलि २५ मार्चमा हुँदैछ । तर, इमरान खानले कुनै पनि परिस्थितिमा राजीनामा नदिने बताइसकेका छन् ।

उनले सेनासँग आफ्नो राम्रो सम्बन्ध भएको स्पष्ट पार्दै मौजुदा राजनीतिक परिस्थितिमा सेनाको गलत तरिकाले आलोचना गरिएको बताएका छन् । पाकिस्तानको ३४२ सदस्यीय संसदमा अविश्वास प्रस्ताव पारित गर्नको लागि विपक्षीलाई १७२ सांसदको समर्थन चाहिन्छ । सत्ताधारी तहरिक ए इंसाफ पार्टीले विपक्षीमाथि प्रधानमन्त्रीको विरुद्ध मतदान गर्न आफ्ना सांसदहरुलाई घुस दिएको आरोप लगाएको छ ।