काठमाडौं । के रुसले आफ्नो रणनीति परिवर्तन गर्दैछ? के यो युद्ध अब अझ खतरनाक विन्दुमा पुग्न लागेको हो? किनभने रुसले अब कीभबाट आफूलाई टाढा राखेको छ, पूर्वी युक्रेनमा आक्रामक दृष्टिकोण अपनाएको छ र कालो सागरमा रक्षात्मक खेल खेलिरहेको छ।

अमेरिकाले रुसले दुई महिनाको गल्तीबाट पाठ सिकेको र अब युद्धको नयाँ चरण सुरु गरेको चेतावनी दिएको छ । अमेरिकाले आगामी केही साता निकै महत्वपूर्ण हुने बताएको छ ।

रुसी राष्ट्रपति भ्लादिमिर पुटिनले २४ फेब्रुअरीमा युक्रेनविरुद्ध युद्धको घोषणा गरेका थिए । सुरुदेखि नै रुसले युक्रेनको राजधानी कीभमा आक्रमणलाई तीव्र पारेको थियो । तर, टर्कीको इस्तानबुलमा भएको वार्तापछि रुसी सेनाले कीभबाट फिर्ता हुने घोषणा गरेको थियो । अब कीभको अवस्था लगभग सामान्य अवस्थामा फर्किएको छ। त्यहाँको जनजीवन ट्रयाकमा फर्किन थालेको छ । जनता फेरि आफ्नो काममा जान थालेका छन् ।

तर, रुससँगको युद्धमा युक्रेन नराम्ररी ध्वस्त भएको छ । युक्रेनका धेरै सहरमा ठूलो विनाश भएको छ । युक्रेनले मारियुपोलमा एउटा पनि भवन सुरक्षित नभएको दाबी गरेको छ । यसैबीच, युक्रेनी राष्ट्रपति भोलोदिमिर जेलेन्स्कीले पुनर्निर्माणमा ६०० अर्ब डलर लाग्ने बताएका छन् । उनले युक्रेनमा लगानी गर्न आग्रह गरेका छन् ।

युक्रेनसँगको ७० दिनको युद्धपछि अब रुसले पनि आफ्नो रणनीति परिवर्तन गर्न थालेको छ । अमेरिकी सैन्य अधिकारी जनरल मार्क मिलेले रुसी सेनाले अहिले पूर्वी डोनबासमा ध्यान केन्द्रित गरेको बताएका छन् ।

रुसी सेनाले युद्धको पहिलो दिनदेखि युक्रेनको राजधानी कीभमा मिसाइल आक्रमण र बमबारी सुरु गरेको थियो। तर, धेरै दिनको लडाइँपछि पनि रुसी सेनाले यहाँ कुनै सफलता नपाएपछि यहाँबाट फर्कने घोषणा गरेको थियो ।

गत महिना, रूसले डोनबास कब्जा गर्ने लक्ष्य भएको बताएको थियो । डोनबास पूर्वी युक्रेनमा अवस्थित छ। यहाँ अधिकांश जनसंख्याले रुसी भाषा बोल्छन्, त्यसैले रूसले यसलाई दाबी गर्छ। डोनबासमा सन् २०१४ देखि रुस समर्थित पृथकतावादी र युक्रेनी सेनाबीच युद्ध चलिरहेको छ ।

२४ फेब्रुअरीमा युद्ध सुरु गर्नुअघि रुसी राष्ट्रपति पुटिनले डोनेट्स्क र लुहान्स्कलाई छुट्टाछुट्टै राष्ट्रको रूपमा मान्यता दिएका थिए । डोनेट्स्क र लुहान्स्क डोनबासमा नै छन्। रुस समर्थित पृथकतावादीहरूले सन् २०१४ देखि डोनेस्क र लुहान्स्कमा सरकार चलाइरहेका छन्।

अहिले रुसी सेनाले आफ्नो पूरा ध्यान पूर्वी युक्रेन अर्थात् डोनबासमा केन्द्रित गरेको छ । रुसी सेनाले यहाँ लगातार बमबारी र मिसाइल आक्रमण गरिरहेको छ । मङ्गलबार नै रुसी सेनाले पूर्वी युक्रेनको अवदिभकामा रहेको रासायनिक प्लान्टमा बमबारी गरेको थियो । युक्रेनले यस बम विष्फोटमा १० जनाको ज्यान गएको बताएको छ ।

डोनेट्स्कका गभर्नर पाभ्लो किरिलेन्कोले समाचार एजेन्सीलाई भने कि रुसी सेनालाई कहिले र कहाँ आक्रमण गर्ने भन्ने थाहा थियो। बस बिसौनीमा घर जानका लागि बस पर्खिरहेका मजदुरहरुमाथि आक्रमण भएको उनले बताए ।

युक्रेनी अधिकारीहरूले रुसले मे ९ मा युद्धको अन्त्यको घोषणा गर्ने विश्वास गर्छन्। यसअघि युक्रेनका जनरल स्टाफले रुसी राष्ट्रपति पुटिनले जुनसुकै अवस्थामा मे ९ सम्ममा यो युद्ध अन्त्य गर्न चाहेको दाबी गरेका थिए ।

वास्तवमा, ९ मे १९४५ मा हिटलरको नाजी सेनाले सोभियत सेनासमक्ष आत्मसमर्पण गरेको थियो । त्यसयता हरेक वर्ष मे ९ मा मस्कोको रेड स्क्वायरमा विजय परेड मनाइन्छ। पुटिनले यसै वर्ष मे ९ मा युक्रेनमाथि विजयको घोषणा गर्ने योजना बनाएका छन् ।

डोनबासमाथिको आक्रमणलाई तिव्रता दिने उद्देश्य पनि सोही योजनाको हिस्सा रहेको बताइएको छ । रुस युक्रेनबाट डोनबास अलग गर्न चाहन्छ। युक्रेन दुई भागमा बाँडिएपछि यो रुसका लागि ठूलो जित सावित हुनेछ ।