जेलेन्स्कीको वाशिंगटन भ्रमण : युक्रेनले प्याट्रियट एयर डिफेन्स सिस्टम पाउने अमेरिकाको घोषणा
काठमाडौं । संयुक्त राज्य अमेरिकाले बुधवार भनेको छ कि उसले युक्रेनलाई आफ्नो आधुनिक प्याट्रियट एयर डिफेन्स सिस्टम उपलब्ध गराउने छ र रुसको लगातार हवाई आक्रमणबाट जोगाउनेछ ।
युक्रेनी राष्ट्रपति भोलोदिमिर जेलेन्स्कीको वाशिंगटन भ्रमणका क्रममा अमेरिकाले १.८५ बिलियन डलर सहयोग गर्ने वाचा गरेको छ र प्याट्रियट एयर डिफेन्स सिस्टम यस सुरक्षा प्याकेजको हिस्सा हो।
फेब्रुअरीमा रुसले आक्रमण गरेपछि राष्ट्रपति जेलेन्स्कीको यो पहिलो विदेश यात्रा हो। यो कीभको लागि ठूलो उपलब्धि हो। यसका लागि उनले लामो समयदेखि अमेरिकालाई दबाब दिइरहेका थिए ।
अमेरिकाको घोषणालाई युक्रेनलाई समर्थन गर्ने बलियो सङ्केतका रूपमा हेरिएको छ ।
अमेरिकी विदेशमन्त्री एन्टोनी ब्लिन्केनले भने, “आजको सहायतामा पहिलो पटक प्याट्रियट एयर डिफेन्स सिस्टम समावेश छ। यो क्रुज मिसाइल, छोटो दुरीको ब्यालेस्टिक मिसाइल र लडाकु विमानहरू खसाल्न सक्षम छ। यो आजसम्म दिइएको वायु रक्षा प्रणालीभन्दा उच्च क्षमताको छ।”
समाचार एजेन्सी एएफपीका अनुसार यो सुरक्षा प्याकेजमा प्याट्रियट ब्याट्री समावेश छ। यसमा कमाण्ड सेन्टर, राडार स्टेशन र क्षेप्यास्त्र लन्चरहरू आउने खतराहरू पत्ता लगाउन सुसज्जित हुनेछ। यसमा ठूलो मात्रामा गोला बारूद, रकेट, मोर्टार प्रणाली र ग्रेनेड लन्चरहरू समावेश छन्।
युक्रेनका राष्ट्रपति भोलोदिमिर जेलेन्स्कीले प्याट्रियट प्रणाली दिने अमेरिकी घोषणाको प्रशंसा गर्दै यसले आफ्नो वायु रक्षा प्रणालीलाई बलियो बनाउने बताए ।
Facebook Comment