काठमाडौं । युक्रेनी राष्ट्रपति भोलोडिमिर जेलेन्स्कीको अमेरिका भ्रमणप्रति रुसले कडा प्रतिक्रिया दिएको छ र अमेरिकाले आफूसँग प्रोक्सी युद्ध गरिरहेको आरोप लगाएको छ ।

अमेरिकाका लागि रुसी राजदूत अनातोली एन्टोनोभले यो ‘उत्तेजक कार्य’ भएको र यसको नतिजा भयानक हुनसक्ने बताएका छन्।

अनातोली एन्टोनोभले रुसी सरकारी सञ्चारमाध्यमलाई दिएको अन्तर्वार्तामा भनेका छन्, “रुसी जनताले आफ्नो कदमको बारेमा सोच्न चाहन्छन् तर युक्रेनलाई प्याट्रियट मिसाइल प्रतिरक्षा प्रणाली दिने समाचार चिन्ताजनक छ।”

यसै क्रममा क्रेमलिनका प्रवक्ता दिमित्री पेस्कोभले जेलेन्स्कीको अमेरिका भ्रमणमा शान्तिको विषयमा कुनै वार्ता नभएको बताएका छन् । यसले अमेरिकाले रुससँग प्रोक्सी युद्ध गरिरहेको प्रमाण दिएको बताए ।

उनले भने, “युक्रेनको यो कदमले रुसलाई आफ्नो विशेष सैन्य अभियानको लक्ष्य हासिल गर्नबाट रोक्ने छैन।”

यसैबीच, रुसी विदेश मन्त्रालयका प्रवक्ता मारिया जाखारोभाले भनिन्, “युक्रेनी राष्ट्रपति र अमेरिकी राष्ट्रपतिको वासिङ्टनमा भएको भेटले युक्रेन र अमेरिका शान्ति चाहँदैनन् भन्ने देखाउँछ। उनीहरुको नियत युद्ध जारी राख्ने हो।”

यस वर्षको फेब्रुअरीमा रुस–युक्रेन युद्ध सुरु भएयता जेलेन्स्कीले अमेरिकाको भ्रमण गरेको यो पहिलो पटक हो । यस क्रममा उनले अमेरिकी राष्ट्रपति बाइडेनलाई भेटे र अमेरिकी संसदलाई पनि सम्बोधन गरे।

यस अवसरमा बाइडेनले युक्रेनलाई १.७ अर्ब डलरको नयाँ राहत प्याकेज घोषणा गरेका छन् जसमा उनले थप ४५ अर्ब डलर दिने वाचा पनि गरेका छन् । साथै उनले अमेरिका युक्रेनको साथमा दृढतापूर्वक उभिने बताए ।

प्याट्रियट मिसाइलहरू महँगो मात्रै होइन, तिनीहरू अझ प्रभावकारी र घातक पनि छन्। ह्वाइट हाउसले भनेको छ “उनीहरूले युक्रेनलाई रुसको बर्बर आक्रमणबाट आफ्नो महत्वपूर्ण पूर्वाधारको रक्षा गर्न मद्दत गर्नेछन्।”