काठमाडौं । रुस र युक्रेनबीच जारी युद्ध सुरु भएको ३ सय दिनभन्दा बढी भइसकेको छ । तर दुई देशबीच चलिरहेको युद्ध अहिले रोकिने अवस्था देखिएको छैन । भर्खरै युक्रेनका राष्ट्रपति भोलोदिमिर जेलेन्स्की अमेरिका भ्रमणमा गएका थिए, जहाँ अमेरिकाले उनलाई १ अर्ब ८५ करोड डलर आर्थिक सहायता दिएको थियो । तर, यही बीचमा रुसी राष्ट्रपति भ्लादिमिर पुटिनले ठूलो बयान दिएका छन् ।

रुसमा सञ्चारमाध्यमलाई सम्बोधन गर्दै पुटिनले युक्रेनसँग लामो समयदेखि चलिरहेको युद्ध अन्त्य गर्न चाहेको बताएका छन् । उनले सैन्य संघर्ष जारी राख्ने आफ्नो लक्ष्य नभएको बरू आफूले युद्ध अन्त्य गर्न चाहेको बताए । पुटिनले युद्ध अन्त्यका लागि आफूले पहल गरिरहेको र भविष्यमा पनि यस्तै प्रयास जारी रहने बताए । कूटनीतिक वार्ताबाट मात्र सशस्त्र युद्धको अन्त्य गर्न सकिने उनले बताए ।

सञ्चारमाध्यमसँगको कुराकानीमा पुटिनले युक्रेनलाई अमेरिकी प्याट्रियट डिफेन्स सिस्टम उपलब्ध गराइने विषयमा पनि कुरा गरे । उनले युक्रेनलाई अमेरिकाले उपलब्ध गराएको प्याट्रियट एयर डिफेन्स सिस्टम अमेरिकाको पुरानो हतियार प्रणाली भएको र रुस यसको प्रतिकार गर्न सक्षम रहेको बताए । रुससँग यसको प्रतिकार गर्न एस-३०० प्रणाली भएको उनले बताए ।

हालै, नेटो समूहका प्रमुख र महासचिव जेन्स स्टोल्टेनबर्गले रुस-युक्रेन युद्धमा नेटो पछि हट्ने अवस्था नरहेको बताएका थिए। उनले यो युद्धको शान्तिपूर्ण समाधानको सम्भावना बढाउने सबैभन्दा राम्रो उपाय युक्रेनलाई सहयोग गरिरहनु भएको बताए । जेन्स स्टोल्टनबर्गले युक्रेनलाई सहयोग गर्न नेटोले सक्दो सहयोग गर्ने बताएका थिए । रुसले युक्रेनको ऊर्जा पूर्वाधारमा लगातार आक्रमण गरिरहेको छ । यस्तो समयमा जाडो नजिकिँदै गर्दा युक्रेनलाई थप स्रोतहरू चाहिन्छ।

रुसले आफ्नो छिमेकी राष्ट्र युक्रेनमा २४ फेब्रुअरीमा आक्रमण गरेको थियो । विगत १० महिनामा युद्धले हजारौंको ज्यान लिइसकेको छ र लाखौं विस्थापित भएका छन्। युक्रेनका राष्ट्रपति जेलेन्स्कीले यस हप्ता भनेका थिए कि रूसले दोस्रो विश्वयुद्धपछिको युरोपको सबैभन्दा ठूलो द्वन्द्व अन्त्य गर्न आवश्यक छ। रुसले शान्तितर्फ कदम चाल्नुपर्छ र क्रिसमसबाट युक्रेनबाट आफ्ना सेना फिर्ता गर्न थाल्नुपर्छ। रुसले सेना फिर्ता गर्न जेलेन्स्कीको आह्वानलाई अस्वीकार गरेको छ र कीभलाई नयाँ क्षेत्रीय “वास्तविकताहरू” स्वीकार गर्न भनेको छ।