काठमाडौं । हिमपातले उत्तरी अमेरिकामा ठूलो क्षति पुर्याएको छ । आँधीका कारण हालसम्म कम्तीमा ६० जनाको मृत्यु भइसकेको छ । यस आँधीको प्रभाव दक्षिण टेक्सास प्रान्तदेखि क्यानडासम्म देखिएको छ ।

तर सबैभन्दा ठूलो असर न्यूयोर्क राज्यको बफेलो सहरमा परेको छ, जहाँ यसका कारण धेरै मानिसको मृत्यु भएको छ । केही व्यक्ति ४८ घण्टाभन्दा बढी समयदेखि सवारी साधनमा फसेको स्थानीय अधिकारीहरूले बताएका छन् ।

यसैबीच न्यूयोर्क प्रान्तका धेरै क्षेत्रमा नौ इन्चसम्म हिउँ पर्ने सम्भावना रहेको मौसमविद्ले बताएका छन् ।

यस प्राकृतिक प्रकोपलाई ध्यानमा राख्दै अमेरिकी राष्ट्रपति जो बाइडेनले न्यूयोर्कमा सङ्कटकाल घोषणा गर्न स्वीकृत गरेका छन् ताकि प्रान्तले संघीय सहायता पाउन सकोस्।

एरी काउन्टी अफिसर मार्क पोलोनकार्जले भने, “हामी सुरुङको अन्त्यमा प्रकाश देख्न सक्छौं। तर यो अझै अन्त्य भएको छैन। यो एक पुस्ताको आँधी हो।”

स्थानीय स्वास्थ्य विभागलाई उद्धृत गर्दै पोलोन्कार्जले हिउँ खन्दा धेरैको मुटुको समस्याले मृत्यु भएको र केही सवारी साधनमा मृत अवस्थामा भेटिएको बताए ।

न्युयोर्कका गभर्नर क्याथी होचुलले भने, “यो युद्ध क्षेत्रमा जानु जस्तै हो र सडकको छेउमा पार्क गरिएका सवारी साधनहरूको अवस्था हृदयविदारक छ।”