काठमाडौं । पाकिस्तानमा गहुँको पीठोलाई लिएर हाहाकार भएको छ । यहाँ पिठोको मूल्य अहिलेसम्मकै उच्च भएको छ । जनतालाई बजारबाट पिठो किन्न मुस्किल भएको छ । पाकिस्तानभरको बजारबाट सहुलियतको पीठोको स्टक सकिएको छ। अवस्था यति नाजुक बनेको छ कि अब सरकारले जनतालाई सहुलियतको पिठो सस्तोमा उपलब्ध गराउन पहल गर्नुपर्ने भएको छ ।

आइतबार, पाकिस्तानका विभिन्न भागहरूमा, सरकारी अनुदानमा पिठो प्याकेटहरू बजार भन्दा कम मूल्यमा आम नागरिकहरूलाई वितरण गरिएको थियो। यो लिन पनि मानिसको भीड लागेको थियो र सहुलियतमा पिठोको प्याकेट लिन खोज्दा देशभर जम्मा भएको भीडका कारण तीनवटा दुर्घटनामा परी धेरै घाइते भएका छन् ।

पीठोको मूल्य बढेपछि पाकिस्तानमा कस्तो अवस्था सिर्जना भएको छ भन्ने यी तीनवटा घटनाबाट बुझ्न सकिन्छ । सिन्ध प्रान्तमा अनुदानको प्याकेट पिठो लिन खोज्दा एक व्यक्तिको ज्यान गएको छ । केही व्यक्तिहरू सिन्धको मिरपुर खासमा गाडीमा पिठोका प्याकेट लिएर आइपुगे। सस्तोमा पिठोको प्याकेट लिन खोज्दा ठूलो संख्यामा मानिसहरु भेला भएका थिए ।

मानिसहरु गाडीको पछाडि दौडिरहेको देखिन्थे । सबैले सस्तोमा एक प्याकेट पिठो पाउन खोजिरहेका थिए । गाडीमा पिठोको प्याकेट सिमित थियो । स्थिति भागदौडमा परिणत भयो र एकजना लडेर घाइते भए, जसको घटनास्थलमै मृत्यु भयो। मृतक ४५ वर्षका र ६ सन्तानका पिता रहेको बताइएको छ । उनले आफ्नो परिवारको लागि सस्तो मूल्यमा पीठो खोजिरहेका थिए।

पाकिस्तान खैबर पख्तुनख्वा र बलुचिस्तान प्रान्तमा, बजारमा सब्सिडीको पीठोको स्टक समाप्त भएको खबर छ। खैबर पख्तुनख्वामा, मानिसहरू पीठोको लागि सरकारी पसलहरू खोजिरहेका देखिए जहाँ पीठोको प्याकेट १२०० रुपैयाँमा पाइन्छ। खुल्ला बजारमा २० किलोको पिठोको प्याकेटको मूल्य ३१ सय रुपैयाँसम्म पुगेको छ ।

सरकारले एक प्याकेट पिठोको मूल्य १२ सय रुपैयाँ तोकेको अवस्था छ । बलुचिस्तानमा पनि यस्तै अवस्था छ । सब्सिडीमा पिठोको प्याकेट लिन खोज्दा मानिसहरू झगडा गरेको देखियो। बढ्दो मुद्रास्फीति नियन्त्रण गर्न पाकिस्तान सरकारलाई गाह्रो देखिन्छ। पिठोसँगै अन्य उपभोग्य वस्तुको मूल्य पनि आकाशिएको छ ।