काठमाडौं। गण्डकी प्रदेशसभाले आज नयाँ सभामुख पाएको छ। माओवादी केन्द्रका कृष्ण धिताल गण्डकी प्रदेशसभाको सभामुखमा निर्वाचित भएका छन्।

कांग्रेसकी सरस्वती अर्याल तिवारीलाई पराजित गरेका धितालले ३२ मत ल्याउँदा तिवारीले २६ मत मात्रै ल्याइन।

धिताल गोरखा १ (क)बाट निर्वाचित सदस्य हुन्। सत्ता गठबन्धनमा गण्डकीमा मुख्यमन्त्री र उपसभामुख एमाले र सभामुख माओवादीले पाउने सहमति यसअघि नै भएको थियो।

६० सदस्य प्रदेश सभामा काँग्रेसका २७, एमालेका २२, माओवादीका आठ, राप्रपाका दुई र एक स्वतन्त्र सांसद छन् । मतदानमा ५८ सांसद सहभागी थिए। धिताललाई एमालेका २२, माओवादीका ८, राप्रपाका २ र स्वतन्त्र सांसदले मतदान गरेका थिए।

नेपालको संविधानको धारा १८२ को उपधारा (१) बमोजिम प्रदेश सभाको पहिलो बैठक बसेको १५ दिनभित्र प्रदेश सभाका सदस्यहरूले आफुहरूमध्येबाट प्रदेश सभाको सभामुख र उपसभामुखको निर्वाचन गर्नुपर्छ। प्रदेश सभाको पहिलो बैठक १८ पुसमा बसेको थियो।