काठमाडौं । जी–२० देशका विदेशमन्त्रीहरुको बैठकपछि संयुक्त वक्तव्य जारी हुन सकेन । सदस्य राष्ट्रहरुको मतभेदका कारण यस्तो भएको हो ।

रुस र चीनले अध्यक्षीय सारांश र नतिजा कागजातमा दुई अनुच्छेदहरूमा आपत्ति जनाए जसले युक्रेनमा चलिरहेको रूसी ‘युद्ध’ लाई उल्लेख गरेको छ।

अब चिनियाँ विदेश मन्त्रालयकी प्रवक्ता माओ निङले पत्रकार सम्मेलनमा यसबारे आफ्नो प्रतिक्रिया दिएकी छिन् ।

समाचार एजेन्सी एएफपीले सोधेको प्रश्नको जवाफमा माओ निङले भनिन्, “युक्रेनको मुद्दामा चीनको अडान अझै परिवर्तन भएको छैन। जी-२० अन्तर्राष्ट्रिय वित्तीय सहयोगका लागि महत्वपूर्ण समूह हो। बाली शिखर सम्मेलनका क्रममा राष्ट्रका नेताहरूले सदस्य राष्ट्रहरूले जी-२० सुरक्षासँग सम्बन्धित मुद्दाहरू समाधान गर्ने फोरम नभएको बताए।’

चिनियाँ प्रवक्ताले भनिन्, “जी-२० देशका नेताहरूले आर्थिक सुधार, स्थायित्वमा ध्यान दिनुपर्छ भन्ने चीनको विश्वास छ।”

माओ निङले भनिन्, “हामीले युक्रेन मुद्दामा जी-२० सदस्यहरूको फरक-फरक धारणा रहेको पनि देख्यौं। हामी आशा गर्छौं कि जी-२० सदस्यहरूले एकअर्काको सरोकारलाई सम्मान गर्नेछन् र विभाजनको सट्टा एकताको सन्देश दिनेछन्।”

तर, संयुक्त वक्तव्यमा सहमति हुन नसकेको यो पहिलो पटक भने होइन । यसअघि जी २० देशका अर्थमन्त्रीहरुको बैठकमा रुस र चीनको आपत्तिपछि संयुक्त वक्तव्य जारी हुन सकेको थिएन ।

भारतका विदेशमन्त्री एस जयशंकरले भने, “केही विवादका बिन्दुहरू थिए। साँच्चै भन्न चाहन्छु कि युक्रेन द्वन्द्वमा फरक-फरक विचारहरू थिए। विभिन्न दलहरूबीच मतभिन्नता भएकाले यसमा सहमति हुन सकेन। विश्वव्यापी रूपमा यो छ। यी देशहरूमा खाद्यान्न, तेल र मलको मूल्य आकाश छोएको हुनाले दक्षिणका लागि गर या मरको स्थिति बन्न पुगेको छ, यी गम्भीर विषय हुन्।”