काठमाडौं । अफगानिस्तानमा तालिबानद्वारा सञ्चालित स्वास्थ्य मन्त्रालयले पोलियोविरुद्ध राष्ट्रव्यापी अभियान सुरु गरिएको जनाएको छ।

यस अभियानअन्तर्गत अफगानिस्तानका ९० लाखभन्दा बढी बालबालिकालाई पोलियो खोप दिइनेछ ।

तालिबान सरकारले जारी गरेको विज्ञप्तिमा पाँच वर्ष मुनिका बालबालिकालाई चार दिने खोप अभियानमा यसको खुराक खुवाइने बताइएको छ ।

यो खोप अभियान अन्तर्राष्ट्रिय सहायता एजेन्सीहरूको सहयोगमा सञ्चालन भइरहेको छ ।

तालिबान प्रशासनले पोलियो विरुद्धको लडाईमा सहभागी हुन अभिभावक, बुढापाका र आदिवासी नेताहरूलाई अपील गरेको छ।

तालिवानको स्वास्थ्य मन्त्रालयले गत वर्ष देशमा पोलियो सङ्क्रमणका दुईवटा घटना रिपोर्ट भएको जनाएको छ।

अफगानिस्तान र पाकिस्तान मात्र विश्वमा पोलियो उन्मूलन नभएका दुई देशहरू हुन्।